“PSJ” hujumchisi Lionel Messi ikki haftaga diskvalifikasiya qilindi. RMC Sport xabariga ko‘ra, argentinalik bosh murabbiy Kristof Galtiyer va sport direktori Luish Kampush bilan kelishuvga e’tibor bermay, Yaqin Sharqqa uchib ketgan.
O‘zi nima bo‘lgan edi?
Liga 1 33-turidan o‘rin olgan “PSJ” – “Loryen” (1:3) uchrashuvi yakunlanganidan bir necha soat o‘tib, Messi uchib ketishi kerak bo‘lmasa-da, Saudiya Arabistoniga borgan. Futbolchi Galtye va Kampushdan ruxsat so‘ragan, lekin ular Saudiya borgan taqdirda jamoa azolarining jahli chiqishini qayd etgan. Uchrashuvdagi jamoaning mag‘lubiyati ham umumiy vaziyatga ta’sir qilgan.
Lekin Messi baribir qarorini o‘zgartirmagan. Biroq, Goal.com'ning xabar berishicha, Leo “PSJ”ning qatarlik boshliqlarining roziligini olgan. Futbolchi o‘z iltimosi bilan Kampush va Galtyening buyrug‘ini buzdimi? Unday bo‘lmagan taqdirda ham murabbiy va bosh direktorni noqulay ahvolga solib qo‘ydi va balki ularni jamoa oldida obro‘sizlantirdi. Lionel dushanba kuniga belgilangan mashg‘ulotni ham o‘tkazib yubordi.
Messi Saudiya Arabistoniga nima uchun bordi?
Leo Yaqin Sharqda bir necha kunni o‘tkazadi. Ushbu sayohat argentinalikning Saudiya Arabistoni turizm elchisi sifatidagi majburiyatlarini bajarishning bir qismidir.
Messi qanday jazolandi?
Messining xatti-harakati “PSJ” futbolchilariga yoqmadi. Ba’zilar Leoning ruxsat etilmagan safari klub tizimiga bo‘lgan hurmatsizlik deb baholadi. Birinchi navbatda shaxsiy biznes, keyin esa jamoa qarori futbolchilarga yoqmagani aniq. Xullas, jazo o‘zini uzoq kuttirmadi: “PSJ” futbolchini ikki haftaga diskvalifikasiya qildi. Shu tariqa, argentinalik futbolchi “Trua” (7 may) va “Ayachcho” (13 may) bilan o‘yinlarni o‘tkazib yuboradi.
Parijliklarning so‘nggi o‘yinlarda muntazam mag‘lubiyatga uchragani va “Marsel”dan atigi 5 ochkolik farqni inobatga olsak, Messining ikki turda yo‘qligi chempionlik yo‘liga salbiy ta’sir ko‘rsatishi mumkin. 35 yoshli yulduzning “PSJ” bilan shartnomasi mavsum oxirida tugaydi.
Balki bularning barchasi “Barselona”ga qaytish uchundir?
