O‘zbekiston Kubogi 2-turi doirasidagi «Nasaf» – «Surxon» uchrashuvidan keyin termizliklar ustozi Sergey Arslanov o‘z fikrlarini bildirdi.

— O‘yin haqida.
— Hammaga xayrli kech. Birinchi navbatda «Nasaf»ni g‘alaba bilan tabriklayman. Bitta to‘p farqi bilan mag‘lub bo‘ldik. O‘yin kurashlarga boy bo‘ldi. Afsuski, yagona penalti o‘yin natijasini hal qildi. Har doimgi o‘yin uslubimizni bugun ham ko‘rsata oldik. Bu kubok o‘yini. Bugun o‘yin amaliyoti kam bo‘lgan futbolchilarga imkoniyat berdik. Shamil Gasanov ham jarohatdan keyin bugun birinchi marta maydonga tushdi. Darvozabonimiz Azizxon Isakov ham jarohatidan tiklanib, rasmiy uchrashuvda maydonga tushdi. Bugungi o‘yinimiz yaxshi bo‘ldi, bog‘lamlar ham yaxshi ishladi. Biroq, natija qoniqarli bo‘lmadi.

— Asilbek Jumayev nega o‘zgartirdingiz?
— Jumayev kelajagi bor, iqtidorli o‘yinchi. O‘zgartirishga kelsak, chempionat o‘yinlariga qadar tiklanish uchun juda kam vaqt bor. Bizda tiklanish uchun uch kun vaqt bor, bundan tashqari bizni uzoq yo‘l kutib turibdi. Shu sabab ham uni biroz asrashni maqsad qildik.

— «Surxon» jamoasi oldiga ushbu mavsum qanday maqsad qo‘yilgan?
— Ko‘p beriladigan savol. Maqsadlarimiz ancha yuqori. Jamoamiz yosh, ambisiyalarga ega. Biz ham murabbiy sifatida eng yuqori maqsadlarni ko‘zlayapmiz.