«Chelsi» «Kristal Pelas» hujumchisi Vilfrid Zaxaga qiziqish bildirmoqda.
Bu haqda Daily Mail xabar beradi. 30 yoshli futbolchining «Kristal Pelas» bilan shartnomasi joriy mavsum oxirida tugaydi, shuning uchun «Chelsi» futbolchini tekinga qo‘lga kirita oladi.
Qayd etilishicha, «ko‘klar» Zaxaga jiddiy da’vogar, biroq klub hali futbolchi borasida yakuniy qarorga kelgani yo‘q.
Xabar qilinishicha, «burgutlar» o‘z futbolchisiga maoshi ko‘tarilgan holda yangi shartnoma taklif qilgan. Yangi shartnomaga ko‘ra, Zaxa haftasiga 228 ming yevro (yiliga taxminan 12 million yevro) olishi mumkin, bu esa uni klub tarixidagi eng ko‘p maosh oluvchi futbolchiga aylantiradi.
Joriy mavsumda Zaxa barcha musobaqalarda 26 ta o‘yinda maydonga tushib, 7 ta gol urdi va 3 ta golli uzatmani amalga oshirdi.