Rossiyaning «Match TV» telekanali jurnalisti Vasiliy Konov Sports.kz saytiga bergan intervyusida Toshkentda o‘tayotgan boks bo‘yicha jahon chempionatining eng og‘ir vaznda sportchilari haqida o‘z fikrlarini bildirib o‘tdi.

— Qozog‘istonlik Qamshibek Qo‘nqabayevni tabriklash kerak. Uning Aleksey Dronovga qarshi jang juda zo‘r bo‘ldi. Bu jang saralash bosqichining bezagiga aylandi. Arenada qozog‘istonlik muxlislar ko‘p edi. Rossiya delegasiyasi ham o‘z sportchisini faol qo‘llab-quvvatladi. Agar bo‘limlar bo‘yicha tahlil qiladigan bo‘lsa, Aleksey Dronov birinchi raundni o‘z foydasiga hal qildi. Qamshibek raqib uslubiga moslashgan holda jang olib borish yo‘nalishini o‘zgartirdi hamda ikkinchi va uchinchi bo‘limlarda g‘alaba qozondi. Shiddatli kechgan jangda Qo‘nqabayev haqli g‘alabaga erishdi.

— Dronov uchun bu og‘riqli mag‘lubiyat bo‘ldimi?
— Men unga mag‘zava ag‘darmoqchi emasman. Aleksey Dronov — yosh sportchi. Bir necha yillardan beri uni kuzatib kelyapman va shuni aytishim mumkinki, u juda yaxshi o‘sib kelyapti. Kelajakda Dronov jahon va Rossiya boksida dahshatli sportchiga aylanadi. Qo‘nqabayevga esa kamida finalgacha yetib borishini tilab qolaman.

— Qamshibek Qo‘nqabayevning Bahodir Jalolovdan revansh olish imkoniyatlarini qanday baholaysiz?
— Bahodir Jalolov — 92+ kg.da turnirning yaqqol favoriti. U o‘z muxlislarining jiddiy qo‘llab-quvvatlashi ostida jang qilmoqda. Uning dastlabki jangidan kelib chiqib xulosa qiladigan bo‘lsak, arena deyarli to‘lgandi, bo‘sh joy yo‘q edi, barcha uni qo‘llab-quvvatladi. O‘zbekistonda unga bo‘lgan e’tibor juda yuqori. Bunday mas’uliyat ostida u "yonib" ketishi mumkin, ammo buning uchun asos ko‘rmayapman. Jalolov — juda tajribali sportchi. Ha, o‘ta og‘ir vaznda bir zarba hamma narsani hal etishi mumkin. Shunga qaramay, Jalolov — musobaqaning yaqqol favoriti. Agar u oltin medalni qo‘lga kiritmasa, hayron qolarli ish bo‘ladi.