Dzyudo bo‘yicha Doha shahri mezbonlik qilayotgan jahon chempionatining ikkinchi kunida ham O‘zbekiston terma jamosining g‘aznasi yana bir medal bilan boyidi. -52 kg vazn toifasida kurashgan Diyora Keldiyorova kumush medalni qo‘lga kiritdi.

Hamyurtimiz qiziqarli kechgan final bellashuvida yaponiyalik Uta Abega imkonoyatni boy berdi. Bu Keldiyorovaning kattalar o‘rtasidagi jahon chempionatlarida qo‘lga kiritgan ilk medali hisoblanadi. Shu bilan birga u jahon va Parij-2024 Olimpiadasi uchun ham qimmatli reyting ochkosini o‘z hisobiga yozib qo‘ymoqda.

Diyora bugungi bahslarni ikkinchi davradan boshlab, dastlab ispaniyalik raqibini mag‘lubiyatga uchratdi. Uchinchi bosqichda u bilan to‘qnash kelishi kutilgan narigi juftlikdagi har ikki sportchi ham diskvalifikasiya qilingach, Keldiyorova chorak finalga to‘g‘ridan-to‘g‘ri yo‘l oldi. Yarim final ostonasida isroillik Gefen Primo, final yo‘lida esa vengriyalik Reka Pupp ham mag‘lub etilgandi.

Eslatib o‘tamiz, kecha Dilshodbek Baratov (-60 kg) ham terma jamoamiz hisobiga kumush medalni taqdim qilgan edi.