Poytaxtimizdagi jahon chempionatining chorak finalida beshinchi bokschimiz o‘z jangini o‘tkazdi. 92 kg vazn toifasidagi vakilimiz Lazizbek Mullojonov ushubu bosqichda Kuba boks afsonasi Xulio Sezar La Kruzga qarshi jang olib bordi.

Hamyurtimiz birinchi bo‘limda aniqlikka harakat qilib, ochkolar uchun ishladi va o‘z maqsadiga erishdi — 4:1.

Ikkinchi taymda 5 karra jahon va 2 karra olimpiya chempioni faollikni oshirib, tajovuzkor jang qilishga intildi. Mullojonov ham bo‘sh kelmadi va teng-teng jang olib bordi. 3:2.

Uchinchi bo‘lim esa Lazizbek ustunligi ostida o‘tdi. U raqibga ko‘plab kuchli zarbalar berdi. Natijada hamyurtimiz muhim jangda g‘alaba qozonib, yarim final yo‘llanmasini qo‘lga kiritdi — 4:1 (29:28, 29:28, 29:28, 28:29, 28:29).

Shu tariqa, Lazizbek Mullojonov turnirdagi uchinchi jangida g‘alaba qozonib, musobaqa yarim finaliga chiqdi. Kunduzgi janglar doirasida O‘zbekiston delegasiyasining 5 a’zosi g‘alaba qozonib, yarim final yo‘llanmasini qo‘lga kiritdi. Keyki dastur soat 18:00da boshlanadi. Unda 6 nafar vatandoshimizning janglari o‘rin olgan.

-54 kg: Oybek Jo‘rayev - Gabriel Eskobar (Ispaniya) (B ring, 18:40 dan so‘ng)

-60 kg: Mujibillo Tursunov - Vsevolod Shumkov (Rossiya) (B ring, 18:55 dan so‘ng)

-67 kg: Asadxo‘ja Mo‘ydinxo‘jayev - Roniel Iglesias (Kuba) (B ring, 19:25 dan so‘ng)

-75 kg: A’loxon Abdullayev - Filip Akilov (Vengriya), (B ring, 19:55 dan so‘ng)

-86 kg: Shohjahon Abdullayev - Alfonso Domingez (Ozarbayjon) (A ring, 20:25 dan so‘ng)

+92 kg: Bahodir Jalolov - Qamshibek Qo‘nqabayev (Qozog‘iston) (B ring, 21:10 dan so‘ng).