Erling Xoland jurnalistlar talqiniga ko‘ra Angliyada yilning eng yaxshi futbolchisi bo‘ldi.
"Manchester Siti" forvardi 72% ovoz to‘pladi va APL paydo bo‘lganidan beri rekord farq bilan ovozlarni qo‘lga kiritdi.
“Arsenal” vingeri Bukayo Saka ikkinchi, “kanonirlar” yarim himoyachisi Martin Edegor uchinchi, “Manchester Siti” yarim himoyachisi Kevin de Bryuyne to‘rtinchi va “Manchester Yunayted” hujumchisi Markus Reshford beshinchi o‘rinni egalladi.
Xoland Angliyada birinchi mavsumni o‘tkazmoqda. U "Manchester Siti" safida barcha musobaqalarda 47 o‘yinda maydonga tushib, 51 gol va 8 golga assistentlik qilgan.
Angliyaning eng yaxshi ayol futbolchisi sovrini "Chelsi" hujumchisi Sem Kerrga nasib etdi. U ketma-ket ikkinchi marta ushbu sovrinni qo‘lga kiritdi.
Xoland va Kerr mukofotlarni 25 may kuni tantanali kechki ovqatda qabul qilib oladi.