Toshkentda o‘tkazilayotgan boks bo‘yicha erkaklar o‘rtasidagi jahon chempionatida bugun 7ta vaznda so‘nggi final janglari o‘tkazilmoqda. Belgrad-2021 mundialida kumush medalini qo‘lga kiritgan Abdumalik Halakov (57 kg.) oltin medal uchun kubalik Rodriges Xortaga qarshi ringga ko‘tirildi.
Har qanday bokschi uchun noqulay jang uslubiga ega bo‘lgan Abdumalik raqibga nisbatan ko‘proq zarbalar berdi. Kubalik charm qo‘lqop ustasi g‘alaba uchun katta ishtiyoq bilan jang qildi. Ammo Halakovni mag‘lub etish qiyin edi. U barcha raundlarda ustunlikka erishdi. Ikkinchi bo‘limda referi Xortaga ogohlantirish bergani uchun hattoki undan bir ball olib tashlandi — 5:0 (30:26, 30:26, 30:26, 30:26, 29:27).
Shu tariqa, Abdumalik Halakov jahon chempionatida kumush medaldan so‘ng oltin medalni o‘z hisobiga qo‘shib qo‘ydi.
Toshkentdagi turnirda oltin medallarimiz soni to‘rttaga yetdi. Umumjamoa hisobida O‘zbekiston birinchi o‘rinda bo‘lishi aniq bo‘ldi!