Toshkentda o‘tkazilayotgan boks bo‘yicha erkaklar o‘rtasidagi jahon chempionatida bugun 7ta vaznda so‘nggi final janglari o‘tkazilmoqda. 63,5 (64) kg vazn toifasida ringda 2021 va 2022 yilgi Osiyo chempionlari Chinxorig Baatarsux (Mo‘g‘uliston) va Ruslan Abdullayev (O‘zbekiston) to‘qnash kelishdi.

Mo‘g‘ul bokschisi bo‘y va qo‘llarining uzunligi jihatdan ustunlikka ega bo‘lsa, hamyurtimiz o‘zining tajovuzkor harakatlari evaziga raqibning bu ustunligini yo‘qqa chiqarishga harakat qildi. Birinchi va ikkinchi raundlarda hamyurtimiz kichik ustunlikka ega bo‘ldi va ikki bo‘lim yakuniga ko‘ra faqat ikki nafar hakamning ovozida ikki ochkolik farqni yuzaga keltirdi. Barchasini uchinchi bo‘lim hal etishi kerak edi.

Uchinchi bo‘limda har ikki sportchi charchab qolgani sezilib turdi. Ruslan esa ishtiyoq evaziga raqibga nisbatan ko‘proq zarba yo‘llay oldi. Natijada yakuniy baholar 5:0 ko‘rinishda bo‘ldi — 30:27, 29:28, 29:28, 29:28, 29:28.

Shu tariqa, Ruslan Abdullayev Osiyo chempionligidan so‘ng jahon chempionligini qo‘lga kiritdi.

Toshkentdagi turnirda oltin medallarimiz soni beshtaga yetdi.