Toshkentda o‘tkazilayotgan boks bo‘yicha erkaklar o‘rtasidagi jahon chempionatida bugungi final janglarida o‘zbekistonlik sportchilar o‘z ishtiroklarini yakunlashdi. 71 kg vazndagi vakilimiz Saidjamshid Ja’farov Qozog‘iston terma jamoasi sardori Aslanbek Shimbergenovga qarshi ringga ko‘tarildi.

Shimbergenov asosan qarshi hujumda harakat qilgan bo‘lsa, hamyurtimiz birinchi raqam ostida ishlashga intilib, ko‘p vaziyatlarda pala-partishlikka yo‘l qo‘ya boshladi. Saidjamshid birinchi zarba berishga intildi, ammo ko‘p holatlarda zarbasi aniq bo‘lmagani uchun "klinch" holatiga kirib qolaverdi.

Birinchi bo‘lim Aslanbek foydasiga hal bo‘lgan bo‘lsa, Ja’farov ikkinchi raundda 3:2 hisobida g‘alaba qozonib, so‘nggi raund oldidan g‘alaba uchun nazariy imkoniyatni saqlab qoldi. Ammo uchinchi bo‘limdagi pala-partish harakat tufayli o‘zbek bokschisi o‘z maqsadiga erisha olmadi. Uchinchi bo‘lim va yakuniy natijalar Shimbergenov foydasiga hal bo‘ldi — 0:5.

Shu tariqa, Saidjamshid Ja’farov ikki karra Osiyo chempionligidan so‘ng o‘z hisobiga jahon chempionatining kumush medalini qo‘shib qo‘ydi. 29 yoshli Shimbergenov esa o‘z faoliyatida ilk marta jahon chempioni unvoniga savozor bo‘ldi.

O‘zbekiston terma jamoasi Toshkentdagi jahon chempionatini 5 ta oltin, 2 ta kumush va 2 ta bronza medali bilan yakunladi. Bu esa boksimiz tarixidagi rekord natija hisoblanadi. Delegasiyamiz umumjamoa hisobida birinchi o‘rinni qo‘lga kiritdi.