Тошкентда ўтказилаётган бокс бўйича эркаклар ўртасидаги жаҳон чемпионатида бугунги финал жангларида ўзбекистонлик спортчилар ўз иштирокларини якунлашди. 71 кг вазндаги вакилимиз Саиджамшид Жаъфаров Қозоғистон терма жамоаси сардори Асланбек Шимбергеновга қарши рингга кўтарилди.

Шимбергенов асосан қарши ҳужумда ҳаракат қилган бўлса, ҳамюртимиз биринчи рақам остида ишлашга интилиб, кўп вазиятларда пала-партишликка йўл қўя бошлади. Саиджамшид биринчи зарба беришга интилди, аммо кўп ҳолатларда зарбаси аниқ бўлмагани учун "клинч" ҳолатига кириб қолаверди.

Биринчи бўлим Асланбек фойдасига ҳал бўлган бўлса, Жаъфаров иккинчи раундда 3:2 ҳисобида ғалаба қозониб, сўнгги раунд олдидан ғалаба учун назарий имкониятни сақлаб қолди. Аммо учинчи бўлимдаги пала-партиш ҳаракат туфайли ўзбек боксчиси ўз мақсадига эриша олмади. Учинчи бўлим ва якуний натижалар Шимбергенов фойдасига ҳал бўлди — 0:5.

Шу тариқа, Саиджамшид Жаъфаров икки карра Осиё чемпионлигидан сўнг ўз ҳисобига жаҳон чемпионатининг кумуш медалини қўшиб қўйди. 29 ёшли Шимбергенов эса ўз фаолиятида илк марта жаҳон чемпиони унвонига савозор бўлди.

Ўзбекистон терма жамоаси Тошкентдаги жаҳон чемпионатини 5 та олтин, 2 та кумуш ва 2 та бронза медали билан якунлади. Бу эса боксимиз тарихидаги рекорд натижа ҳисобланади. Делегациямиз умумжамоа ҳисобида биринчи ўринни қўлга киритди.