"Chelsi" futbolchilari Maurisio Pochettinoning bosh murabbiy etib tayinlanishi ehtimolidan mamnun, deb yozadi jurnalist Ben Jeykobs o‘zining tvitterida.
Manbaga ko‘ra, argentinalik loyihadan ilhomlangan va hozirgi davrni London klubi bilan hamkorlikni boshlash uchun eng qulay vaqt deb hisoblamoqda. "Chelsi" vakillari Pochettino bilan sentyabr oyida, Tomas Tuxel ishdan bo‘shatilgandan so‘ng bog‘lanishgan, biroq murabbiy rad javobini bergan edi.
Xabar qilinishicha, 51 yoshli mutaxassis iyul oyida ishni iloji boricha samarali bajarish uchun vaqtinchalik bosh murabbiy Frenk Lempard va "Chelsi" rahbariyati bilan ishlamoqda.
Qayd etilishicha, londonliklarning asosiy futbolchilari Pochettinoning ehtimoliy tayinlanishidan mamnun.
Avvalroq, "Chelsi" argentinalik mutaxassis bilan shartnoma borasida kelishib olgani haqida xabar berilgandi. Bu haqda klub tez orada rasman e’lon qiladi. Shartnoma uch yilga mo‘ljallangan.
