Daily Mail xabariga ko‘ra, "Chelsi" yarim himoyachisi Mateo Kovachich yozda London klubini tark etadi.
Manbaga ko‘ra, 29 yoshli xorvatga asosiy da’vogar "Manchester Siti" bo‘lib turibdi. Qayd etilishicha, “shaharliklar” bosh murabbiyi Xosep Gvardiola futbolchining o‘yiniga qoyil qolgan.
Kovachichning "Chelsi" bilan amaldagi shartnomasi 2024 yilning yoziga qadar mo‘ljallangan. Xorvatiya terma jamoasi futbolchisini Transfermarkt 40 million yevroga baholagan.
Yarim himoyachi joriy mavsumda “ko‘klar” safida 36 ta o‘yinda maydonga tushib, 2 ta gol urdi va 2 ta golli uzatmani amalga oshirdi. Kovachich 2018 yildan buyon “Chelsi” sharafini himoya qilib kelmoqda, u londonliklar bilan Chempionlar ligasida g‘olib chiqishga muvaffaq bo‘ldi.
