Superliga 10-turida o‘z maydonida «Nasaf»ga mag‘lub bo‘lgan «Metallurg» klubi bosh murabbiyi Vesko Steshevich mag‘lubiyat sabablari, taktika, Toshqo‘ziyevning pozisiyasi va Ibragimovning jarohati o‘yinga qanday ta’sir qilgani haqida gapirdi.

“Yigitlarga bugungi o‘yin va kurashganliklari uchun rahmat aytaman. O‘yinni yaxshi boshlagan edik, gol urdik, vaziyatlar yaratdik, ammo yakunda alamli mag‘lubiyatga uchradik. «Nasaf» sifatli jamoa. Penaltidan o‘tkazib yuborilgan gol bizni biroz sindirdi. Oxirgi daqiqalarda yana gol o‘tkazib mag‘lub bo‘ldik. Alamli mag‘lubiyat”, - dedi Steshevich.

«Yozgi transferlar vaqtida jamoamiz qanday ishlashini vaqt ko‘rsatadi. Bu bilan klubdagilar alohida ishlashadi».

«Toshqo‘ziyevni hujum markaziga o‘tkazganimizning sababi, u raqib himoyachilarini pressingda ushlab, ularning zonasiga bosim qilishini reja qilgandik. U buni deyarli uddaladi, afsuski, biroz charchab qoldi».

«Hisobda oldinda borgan vaqtimizda raqib hujumlarini to‘xtatish va gol o‘tkazib yubormaslik uchun intildik. Ammo, buni uddalay olmadik. Ibragimovni jarohati bois almashtirdim».