Roberto Firmino «Liverpul» bilan xayrlashishidan oldin bir ko‘rsatkich bo‘yicha Yurgen Klopp qo‘l ostida o‘ynagan barcha futbolchilar orasida mutlaq rekordchiga aylanishi mumkin.

Oddiy aytganda, braziliyalik hujumkor yarim himoyachi va germaniyalik mutaxassis o‘rtasidagi o‘ta kuchli bog‘lam yuqori notada uziladigan ko‘rinadi.

Ha, Roberto Firmino yozda erkin agent maqomini olib, faoliyatidagi «Liverpul» sahifasini yopmoqchi. Braziliyalik xayrlashuv sodir bo‘lishidan oldin esa 2015 yili o‘rnatilgan Yurgen Klopp davriga bog‘liq bir ajib rekord­ni yangilashi mumkin. Yakshanba kungi holat bo‘yicha «qizillar» uchun joriy mavsum hisobidan 3ta o‘yin qoldi (Yurgen Klopp jamoasi APL 36-turidan o‘rin olgan «Lester»­ga qarshi uchrashuvni kecha o‘tkazdi). Xullas, Firmino finishga qadar germaniyalik murabbiy qo‘l ostida o‘ynagan daqiqalar bo‘yicha 1-o‘ringa chiqib olish imkoniyatiga ega. Hujumkor yarim himoyachi ayni payt Klopp eng ko‘p o‘ynatgan futbolchilar ro‘yxatida 3-o‘rinni egallab turibdi.

Raqamlarda aytsak, braziliyalik futbolchi germaniyalik murabbiy qo‘l ostida jami 25020 daqiqa harakatlangan. Klopp bilan hamkorlik qilganlar orasida faqat Neven Subotich (25107 daqiqa) va Roman Vaydenfeller (25156 daqiqa)da o‘yin vaqti bundan ko‘proq. Demak, Firminoda Dortmund «Borussiya»sining afsonaviy darvozaboniga tegishli rekordni yangilash va Yurgen Klopp erasida maydonda eng ko‘p vaqt to‘p surgan futbolchiga aylanish uchun real imkoniyat mavjud. Hozirda uni yuqori ko‘rsatkichdan bor-yo‘g‘i 136 daqiqa ajratib turibdi. To‘g‘ri, Muhammad Saloh (24807 daqiqa) keyingi mavsum bu borada mutlaq rekord­chiga aylanadi katta ehtimol. Albatta, agar Yurgen Klopp yonida qolsa.

Yurgen Klopp davrida eng ko‘p vaqt o‘ynagan  futbolchilar (14 may holati bo‘yicha)

1. Roman Vaydenfeller («Borussiya» D.) - 25156 daqiqa

2. Neven Subotich («Borussiya» D.) - 25107 daqiqa

3. Roberto Firmino («Liverpul») - 25020 daqiqa

4. Muhammad Saloh («Liverpul») - 24807 daqiqa

5. Endryu Robertson («Liverpul») - 22650 daqiqa

«Liverpul»ning APL-2022|2023 finishiga qadar o‘yinlari: «Lester» (kecha), «Aston Villa» va «Sautgempton». Firmino shundan so‘ng erkin agent maqomini oladi.