Yozda erkin agent sifatida jamoani tark etadigan Menxengladbaxning "Borussiya" klubi hujumchisi Markus Tyuramga Yevropaning ikki klubidan takliflar kelib tushdi.

L’Equipe nashri xabariga ko‘ra, gap "Atletiko" va "Inter" haqida ketmoqda. Madridliklar 25 yoshli futbolchini Alvaro Morataga o‘rinbosar sifatida ko‘rmoqda, milanliklar esa uni kelajak uchun asosiy futbolchi deb hisoblab, uzoq muddatli shartnoma imzolashga tayyor.

Shuningdek, Chempionlar ligasiga yo‘l olgan nomi noma’lum Bundesliga jamoasi ham unga qiziqish bildirayotgani ko‘rsatilgan. "Manchester Yunayted", "Milan" va "PSJ" hamon voqealar rivojini kuzatishda davom etmoqda, biroq aniq so‘rovlar bo‘lmagan.

Fransiyalik hujumchi joriy mavsumda 31 ta o‘yinda maydonga tushib, 16 ta gol urdi va 7 ta golli uzatmani amalga oshirdi.