Ma’lumki, kecha Superliganing 11-turi doirasida “Bunyodkor” o‘z uyida “Navbahor”ni qabul qilib, yirik hisobda yutqazib qo‘ydi. Bugun “Bunyodkor” futbol klubi direktori Sherzod Haqberdiyev jamoa qarorgohida navbatdan tashqari yig‘ilish o‘tkazdi.

Ochiq, tanqidiy ruhda o‘tgan yig‘ilishda Murod Otajonov boshchiligidagi murabbiylar shtabi, futbolchilar va personal xodimlar ishtirok etdi. Aytish kerak, so‘nggi mavsumlardan farqli ravishda 2023 yil “Bunyodkor”da moliyaviy tomondan muammolar yuzaga kelayotgani yo‘q. “Bunyodkor” futbol klubi ta’sischisi “O‘zbekneftgaz” aksiyadorlik jamiyati rahbariyatining millionlar o‘yiniga berayotgan e’tibori sababidan barcha moliyaviy masalalar o‘z vaqtida hal etilmoqda. Bugungi kunda “Bunyodkor” futbol klubini na futbolchilardan va na xodimlaridan maosh yoki mukofot puli bo‘yicha qarzi yo‘q. Demak, o‘z-o‘zidan ko‘rsatilayotgan e’tiborga yarasha natija ham talab qilinadi.

Sherzod Murodovich yig‘ilishda asosiy urg‘uni shunga qaratar ekan, murabbiy va futbolchilardan “Navbahor”ga qarshi o‘yindagi mag‘lubiyat uchun izoh talab qildi. Bosh murabbiy Murod Otajonov so‘zga chiqib, o‘yinchilarda ayb yo‘qligini, barcha javobgarlikni o‘z bo‘yniga olishini ta’kidladi. Futbolchilar nomidan so‘zga chiqqan jamoa sardori Davronjon Ergashev esa, avvalo barcha sharoitlarni yaratib berayotgani uchun klub rahbariyatiga minnatdorchilik bildirdi. Sardorimiz so‘zida davom etar ekan, jamoa hozir tushib qolgan vaziyat uchun futbolchilar aybdorligini ta’kidlab, aynan o‘zlari “Bunyodkor”ni hozirgi holatdan olib chiqib ketishlarini ma’lum qildi.

Tanqidiy-tahliliy ruhda o‘tgan uchrashuv yakunida so‘z olgan bosh jamoamiz maslahatchi murabbiyi Yuriy Sarkisyan futbolda istalgan klub bu kabi mag‘lubiyatlar bilan to‘qnash kelishini, asosiysi, hammasini tezroq unutib, keyingi bahsga tayyorgarlik ko‘rish shartligini ta’kidladi. O‘z navbatida futbolchilar klub rahbariyati bilan navbatdagi uchrashuv yaxshi kayfiyatda o‘tishiga va’da berishdi.