Zarbalar soni bo‘yicha 1:23 va 0,03 xG ko‘rsatkichi - Joze Mourinyo shu tariqa «Roma»ni YEL finaliga yetakladi. «Bayer»ga achinish mumkin.
Axir Xabi Alonsoning xushchaqchaq jamoasi yarim finalning javob o‘yinida total ustunlikka erishdi, biroq «Benazir» qo‘ygan «avtobus»ni o‘rnidan qimirlatolmadi. Rimdagi birinchi o‘yinda Eduardo Bovening yagona goli evaziga g‘alaba qozongan «bo‘rilar» Leverkuzenga aynan gol qo‘yib yubormaslik missiyasi bilan yo‘l olishgandi va buni uddalashdi.
Zarbalar - 23:1, aniq zarbalar - 6:0, kutilgan gol ko‘rsatkichi - 1,01: 0,03xG. Hammasi «Bayer» foydasiga. Ammo yakuniy natija... Bu Joze Mourinyoning navbatdagi master-saboqi. Leverkuzen jamoasini bir vaziyatda goldan darvoza to‘sini mosuvo qildi, shuningdek, Sardor Azmunning zarbasi o‘ta xavfli chiqdi. «Roma» esa o‘yindagi yagona zarbani 2-daqiqada yo‘lladi, shu ham noaniq chiqdi. To‘g‘ri, «Bayer» statistikasida uzoq va o‘rta masofalardan berilgan oddiy zarbalar ulushi ko‘p. Ikkinchi bo‘limga kelib, «Roma» butunlay o‘z jarima maydoniga chekindi. Biroq mezbonlar «avtobus»ga qarshi qandaydir chora topa olishmadi. Aksincha, rimliklar himoyada o‘ta xotirjam harakatlanishdi. Buning oqibatida «Bayer» vakillari asabiylasha boshlashdi. 6ta sariq kartochka shundan dalolat. Hattoki, bosiq tabiati bilan ajralib turadigan Xabi Alonso ham hakamdan o‘z «nasibasi»ni oldi.
Yakunda «quruq» o‘yin va «Bayer» ham, Xabi Alonso ham finaldan quruq qoldi. Joze Mourinyo «Roma»si aksincha, yana yevrokubok turniri hal qiluvchi bahsida. Rim klubi qatorasiga 2-marta yevromusobaqa finalida o‘ynaydi. Taqqoslash uchun, jamoa Mou davridan oldin butun tarixida ham 2tagina finalni ko‘rgan. Ha, «Benazir» shunday benazir! Aytgancha, Mourinyoning o‘zi yevrokuboklar finallariga bog‘liq ajoyib statistikaga ega: 5ta urishdan 5ta g‘alaba (qit’a superkubogi hisobga olinmagan).
Joze Mourinyo yevrokuboklar finallarida
2002/2003: «Portu» bilan UYEFA kubogida «Seltik» ustidan g‘alaba (3:2)
2003/2004: «Portu» bilan CHLda «Monako» ustidan g‘alaba (3:0)
2009/2010: «Inter» bilan CHLda «Bavariya» ustidan g‘alaba (2:0)
2016/2017: «MYU» bilan YELda «Ayaks»» ustidan g‘alaba (2:0)
2021/2022: «Roma» bilan KLda «Feyenoord» ustidan g‘alaba (3:2)
Portugaliyalik yaqin orada bu statistikasini 6tadan 6ta g‘alaba darajasiga oshirishi mumkin. To‘g‘ri, «Roma» buning uchun YELning yengilmas jamoasi - «Sevilya»ni yengishi kerak.
