«Brayton» treneri bu yoz Makalisterni ushlab qolish imkonsiz ekanini aytdi yaqinda. Bu menimcha, «Brayton» kabi jamoalar uchun eng to‘g‘ri yo‘l. Shunaqa bo‘lish kerak. Agar ayniqsa, APLni qaysidir o‘rtamiyona jamoasi o‘zini top-klubdek his qilishni boshlasa-yu, moliyaviy imkoniyatlar top-6 dan uzoq bo‘lsa, yakunning boshlanishi shu bo‘ladi.

Har qanday klub uchun maqsad kerak. Va unga erishish uchun aniq yo‘l. Top klublar sovrinlar uchun kurash, davomli katta transferlar orqali futbolchilarga «qon quyishadi».

O‘rtamiyona klub uchun esa, seleksiya muhim. To‘g‘ri tanlangan futbolchilar o‘zini ko‘rsatish va top jamoalar safiga o‘tish uchun bor imkoniyatini ishga solishi kerak. Shu baxona klub ham yaxshi natijalarga erishishi mumkin. Ya’ni futbolchilarning shaxsiy motivasiyasi klub uchun ham bevosita foyda keltiradi. Muhimi, bu davomli aylanib turishi kerak.

Menimcha, «Lester», «Everton» yoki «Vest Hem»ning muammosi shunda. Bularning har biri bu mavsum APLni tark etishga yaqin turdi. «Lester» tushib ham ketdi.

Tilemans, Meddison, Rays, Bouen kabi futbolchilar allaqachon jamoa saviyasidan o‘zishgan, har biriga turli shakllarda top-klublar qiziqqan, qiziqmoqda. «Lester» ikki yil YECHL o‘rinlariga yaqin kelganida, yo yetakchilarini sotishi yoki keyingi qadamni qo‘yishi - ya’ni qo‘shimcha katta transferlar amalga oshirishi kerak edi. Joyda turish yaramaydi. Doim bir bosh sakrash imkonsiz.

Top klublar har yili sovrin uchun kurashadi. Murabbiyning vazifasi futbolchilarni mana shu jarayonga ishontirish va yuqori formada ushlab turish.

«Brayton» Bissumani sotib, Keysedoni, Makalisterni sotib Ensisoni o‘ynatish orqali, har yili yuqori motivasiyaga ega tarkibga ega bo‘ladi. Bu murabbiy uchun ishning yarmi. Uyog‘i oson.

«Lester» esa, har ikki yo‘lni ham eplay olmadi.

Qahramon Aslanov.