O‘zbekiston Superligasi 12-turi doirasida bo‘lib o‘tgan “Andijon” hamda “Turon” jamoalari o‘rtasidagi bahsda (2:1) hakamlik bilan bog‘liq bahsli vaziyat bo‘yicha “Turon” klubidan shikoyat xati kelib tushdi va bu bo‘yicha intizomiy chora qo‘llandi.

Uchrashuvning 17-daqiqasida bosh hakam Asker Najafaliyev andijonliklar a’zosi Abdurahmon Komilov fol amalga oshirgani uchun unga sariq kartochka ko‘rsatdi.

Shuningdek, 34-daqiqada “Turon” futbolchisi Bilolxon Toshmirzayev raqibga nisbatan qo‘pollik ishlatgan va referi to‘g‘ridan-to‘g‘ri qizil kartochka bilan uni maydondan chetlatgan.

Ushbu vaziyatlar ekspert hakamlar komissiyasida batafsil ko‘rib chiqildi va ikkala holatda ham xato qaror chiqarilgan, degan xulosaga kelindi.

Birinchi vaziyatda bosh hakam uzoq vaqt VAR yordamidan foydalanganiga qaramay, qizil kartochka emas, sariq kartochka bilan kifoyalandi.

Ikkinchi vaziyatda esa kutilmaganda qizil kartochka ko‘rsatildi va tabiiyki, bu ham noto‘g‘ri qaror ekanligi aytildi. Natijada, Najafaliyevga o‘yin uchun belgilangan maoshning 50 foizi miqdorida jarima, Superliganing 4 ta bahsidan chetlatish hamda quyi ligaga tushish jazosi qo‘llanildi.