“Andijon” jamoasining “Esxata”ga qarshi uchrashuvida jarima zarbasidan gol urgan yarim himoyachi Ilhom Abdug‘aniyev bellashuvdan so‘ng o‘yin borasidagi taassurotlari bilan o‘rtoqlashdi.
- Ilhom, jamoamizning “Esxata”ga qarshi uchrashuvi borasida nimalarni ayta olasiz?
- Yaxshi o‘yin bo‘ldi. Havo issiqligiga qaramasdan ikkala jamoa ham kurashdi. To‘g‘ri, bizda ham, raqibda ham vaziyatlar bo‘ldi. Lekin jamoamizda imkoniyatlar ko‘proq edi. Natija ham yaxshi, yomon emas. Bu o‘rtoqlik o‘yini edi, to‘g‘ri natija ham kerak. Biroq bizga ko‘proq o‘yinimizni yanada shakllantirishga va mashg‘ulotlarda nimalarni bajarayotgan bo‘lsak, shularni o‘yinga olib chiqishga murabbiy tomonidan ko‘rsatma olgandik hamda shularni bajarishga harakat qildik.
- Standart vaziyatdan chiroyli gol urdingiz. Qanday ta’rif berasiz?
- Mashg‘ulotlarda jarima zarbalari ustida ham shug‘ullanyapmiz. O‘sha holatda o‘zimga ishonib tepishga qaror qildim. Jamoadoshlarimga rahmat, menga ishonib berishdi. Xudoga shukr, gol urdim. Bundan xursandman.
- “Esxata” qanday taassurot qoldirdi? Siz kutganchalik o‘ynadimi yoki...
- To‘g‘risi, “Esxata” jamoasidan bunday o‘yinni kutmagandim. Yaxshi jamoa ekan. Raqibni ko‘proq uzun paslar orqali o‘yin ko‘rsatsa kerak, deb o‘ylagandim. Ammo bular ham pas va taktik uslub orqali o‘yin namoyish etar ekan. To‘pni nazorat qila oladi. Hurmatga loyiq jamoa.
