"Pari Sen-Jermen" yarim himoyachisi Marko Verratti o‘z jamoasida qolish niyatida.
Bir necha kun avval ma’lum bo‘lganidek, 30 yoshli futbolchida vataniga qaytish varianti bor edi - "Roma" uni taklif qilmoqchi. Qayd etilishicha, rimliklar ustozi Joze Mourinyo shaxsan o‘zi Verratti bilan bog‘lanib, uni transferga rozi bo‘lishga ko‘ndirgan. L'Equipe xabariga ko‘ra, italiyalik futbolchi "PSJ"ni tark etish niyatida emas. U allaqachon oilasiga Parijda qolish qarori haqida xabar bergan.
Eslatib o‘tamiz, o‘tgan yilning dekabr oyida Marko Verratti "PSJ" bilan shartnomasini 2026 yilgacha uzaytirgandi. U 11 yildan beri Fransiya 1-ligasi giganti sharafini himoya qilib kelmoqda.