Taniqli futbol mutaxassisi Alisher Nikimbayev O‘zbekiston MTJning AQSH bilan o‘tkazadigan ehtimoliy o‘rtoqlik uchrashuvi haqida o‘z fikrini bildirdi. 

"Yaqinda "CAFA" finalidan so‘ng tashkil etilgan matbuot anjumanida O‘zbekiston milliy terma jamoasi bosh murabbiyining yordamchisi jamoaning sentyabr oyida AQSH MTJga qarshi o‘rtoqlik o‘yini o‘tkazishini ma’lum qildi. Hamma uchun ajoyib yangilik. Lekin bitta savol tug‘iladi. Bir necha oy avval O‘zbekiston milliy terma jamoasi sentyabr oyida Sofiyada Bolgariyaga qarshi maydonga tushishini ma’lum qilingandi.

Gap shundaki, FIFA prinsipial jihatdan bir jamoaning turli konfederasiyalar hududida o‘yin o‘tkazishini taqiqlaydi. Agar bir shahardan ikkinchi shahargacha parvoz besh soatdan ko‘p bo‘lmasa hamda vaqt zonalari orasidagi farq ikki soatdan ko‘p bo‘lmasa, bu istisno qilinishi mumkin.

Sofiyadan Sent-Luisgacha deyarli 9000 kilometr. Siz besh soat ucha olmaysiz. Bolgariyaga qarshi o‘yin bekor qilinadimi? Yoki FIFAdan chetlov chegaralari bo‘yicha o‘zgartirishlar so‘raladimi?", – dedi mutaxassis o‘z telegram kanalida.