Таниқли футбол мутахассиси Алишер Никимбаев Ўзбекистон МТЖнинг АҚШ билан ўтказадиган эҳтимолий ўртоқлик учрашуви ҳақида ўз фикрини билдирди.
"Яқинда "CAFA" финалидан сўнг ташкил этилган матбуот анжуманида Ўзбекистон миллий терма жамоаси бош мураббийининг ёрдамчиси жамоанинг сентябрь ойида АҚШ МТЖга қарши ўртоқлик ўйини ўтказишини маълум қилди. Ҳамма учун ажойиб янгилик. Лекин битта савол туғилади. Бир неча ой аввал Ўзбекистон миллий терма жамоаси сентябрь ойида Софияда Болгарияга қарши майдонга тушишини маълум қилинганди.
Гап шундаки, ФИФА принципиал жиҳатдан бир жамоанинг турли конфедерациялар ҳудудида ўйин ўтказишини тақиқлайди. Агар бир шаҳардан иккинчи шаҳаргача парвоз беш соатдан кўп бўлмаса ҳамда вақт зоналари орасидаги фарқ икки соатдан кўп бўлмаса, бу истисно қилиниши мумкин.
Софиядан Сент-Луисгача деярли 9000 километр. Сиз беш соат уча олмайсиз. Болгарияга қарши ўйин бекор қилинадими? Ёки ФИФАдан четлов чегаралари бўйича ўзгартиришлар сўраладими?", – деди мутахассис ўз телеграм каналида.
