Sun’iy ongning chiqargan xulosalariga ko‘ra, "Manchester Yunayted" tarkibni yaxshilash uchun yettita futbolchisidan voz kechishi kerak. Ushbu yoz klub uchun oldi-sotdi borasida qizg‘in kechishi kutilmoqda. Ayniqsa, "qizil iblislar"ning yangi egalar qo‘liga o‘tishi, buni yanada tezlashtirishi aytilgan. Erik ten Xag o‘z jamoasini shakllantirishga harakat qilmoqda. Bunda sotib olish bilan birga, sotuv ishlari ham kerak bo‘ladi. Quyida jamoani kimlar tark etishi kerakligi, sun’iy ong talqini asosida qayd etiladi.
David De Xea
Darvozabonning yana bir yillik shartnomaga imzo chekishi haqida xabarlar mavjud. Ammo bu ish amalga oshganicha yo‘q. Qolaversa, "MYU" allaqachon yangi posbon qidirishga tushgan. Bu shuni anglatadiki, De Xea jamoadan ketadi. Qolgan taqdirda ham, ispaniyalikni maosh pasayishi kutadi. Shuningdek, u ortiq asosiy tarkibda bo‘lmaydi.
Xarri Maguayr
"Manchester Yunayted" sardori borasida allaqachon ko‘plab xabarlar chiqmoqda. Uning klubni tark etishi shundoq ham haqiqatga yaqin edi. Maguayr uchun "Aston Villa" va "Nyukasl" qiziqish bildirgan. Shuningdek, Maguayr "Chelsi" yarim himoyachisi Meyson Mauntni olib kelish uchun ham qurbon qilinishi mumkin.
Lyuk Shou
Shou ushbu ro‘yxatdagi kutilmagan nomdir. U o‘tgan mavsumda ten Xag jamoasi uchun muhim figura bo‘lib xizmat qilgandi. Shou qanot va markaziy himoyada qanchalik kerakligini ko‘rsatib qo‘ya oldi. 27 yoshli futbolchi "MYU"ga "agent"lik qilib ham foyda qilmoqda. U Angliya terma jamoasidagi sheriklari bo‘lmish Xarri Keyn va Deklan Raysni o‘z jamoasiga chorlagani aytiladi. Afsuski, shunday futbolchi superkompyuterning ketish ro‘yxatiga tushib qoldi.
Din Xenderson
Darvozabon mavsumni "Nottingem Forest"da ijara asosida o‘tkazgandi. Uni London klubi 30 million funtga xarid qilishi haqida xabarlar mavjud. "MYU" yangi mavsum uchun boshqa posbon sotib oladigan bo‘lsa, Xendersonga bu jamoada ortiq ish qolmaydi. Shu sabab uning ketgani har ikki tomon uchun foydaliroq bo‘ladi.
Antoni Marsyal
"Manchester Yunayted" "Atalanta" hujumchisi Rasmus Xyoylunni ko‘zlagan. Ingliz giganti daniyalik evaziga puldan tashqari Marsyalni ham berishga tayyor. Fransuz hujumchisi 2022 yilni "Sevilya"da ijara asosida o‘tkazdi. Ammo uzoq cho‘zilgan jarohat Marsyalga o‘zini ko‘rsatish uchun to‘siq bo‘lgandi.
Skott Maktominey
Superkompyuterga ko‘ra, "MYU" yarim himoyachisini 30 million funt uchun sotishga tayyor bo‘ladi. Shotlandiya terma jamoasi a’zosi "Nyukasl" tomonidan jiddiy kuzatilmoqda. Ammo Maktomineyga ten Xag javob bermasa kerak. Qolaversa, u uchun so‘ralayotgan 50 millionlik talab istalgan klubga ko‘plik qiladi.
Shola Shortayr
Shortayr o‘tgan mavsumni "Bolton" safida o‘tkazgan edi. U Chempionship klubida tarkibning muhim figurasiga aylana oldi. Yuqori baholangan yosh himoyachi "Barselona" va "Yuventus" radariga tushib ulgurgan. Agarda Shola yangi mavsum "MYU"ni tark etsa, bu ketish yana ijara asosida bo‘ladi. Harxolda, sun’iy ong shunday hisoblamoqda.
ISMATOV J.