“Milan”ning sobiq hujumchisi Zlatan Ibrahimovich futbol maydoniga qaytishini istisno qilmadi. Avvalroq, 41 yoshli shvesiyalik futbolchi faoliyatini yakunlaganini e’lon qilgandi.
“Albatta, faoliyatimni yakunlaganimga unchalik ko‘p bo‘lgani yo‘q. Lekin balki futbolga qaytaman. Balki bir oydan keyin "Milan"ning yig‘iniga qo‘shilarman", - dedi Ibrahimovich Sport Mediaset nashriga.
O‘tgan mavsumda Ibrahimovich Italiya chempionatining to‘rtta o‘yinida maydonga tushib, bitta gol urgan.
A Seriyaning so‘nggi mavsumi natijalariga ko‘ra, "Milan" 38 uchrashuvdan so‘ng 70 ochko bilan to‘rtinchi o‘rinni egalladi. “Rossonerilar” kelasi mavsumda Chempionlar ligasida ishtirok etadi.
