O‘tgan yilning oxirgi oyi. O‘FA Jamoliddin Bobojonov va kaminani Saudiyaga yo‘l olgan U17 termamiz bilan safarga yubordi. Men ikki o‘yinni youtube orqali o‘shanda sharhlagan edim. O‘rtoqlik bahsi bo‘lsa ham e’tibor yaxshi bo‘lgandi.

Saudiyalik yoshlar bir o‘yinda yenggan, ikkinchisida durang qayd etilgandi. Qiziq voqea aytaman -  mag‘lub bo‘lgan bahsimizda kiperimiz Muhammadyusuf Sobirov Ederson uslubida xatoga yo‘l qo‘ydi va keyingi o‘yinda kim tushishi xususida murabbiylar birrov fikrimiz bilan qiziqishdi. Men, bunaqa xatolar bo‘lib turadi, keyingi o‘yinga yana Yusufni qo‘ysangiz, o‘ziga bo‘lgan ishonchni qaytarib oladi, dedim.

Aslida murabbiylar ham shu fikrda bo‘lishgan, yanada mustahkamlash uchun begona nigohning ham tasdig‘i kerak bo‘lgan, shekilli.

Xo‘p, shu darvozabon bugun terma jamoamizni mundialga olib chiqdi, ha, aynan u olib chiqdi. Taqdirni qarangki, saudlar bilan o‘yinda!!!

Turnir davomida darvoza dahlsizligini ta’minlagani yetmagandek, muhim pallada penaltini qaytardi. Xudo saqlasin, arablar oldinga chiqib olishsa, keyin qanaqa o‘yin bo‘lishini eronliklar ko‘rsatishdi;)

Niyatim bitta: Muhammadyusuf Osiyo chempionatida porlab, mundialda o‘z darajasini ko‘rsata olmagan aka-posbon Otabek Boymurodov kabi katta turnirda yo‘qolib qolmasin. Xaloskorligida bardavom bo‘lsin!

O‘zbek ahlini ushbu ajoyib g‘alaba bilan tabriklaymiz!

Xayrulla Hamidov.