O‘zbekiston Superligasining qoldirilgan 8-turidan o‘rin olgan “Navbahor” – “Buxoro” jamoalari o‘rtasidagi uchrashuv arafasida “lochinlar”ning serbiyalik 27 yoshli tajribali himoyachisi Luka Chermel bo‘lajak o‘yin haqidagi fikrlari bilan o‘rtoqlashdi.

- Garchi bo‘lajak raqibimiz “Buxoro” turnir jadvalining 13-pog‘onasidan joy olib turgan bo‘lsada, har qanday raqibga hurmat bilan yondoshish zarur. Boisi, Superliganing joriy mavsum bahslari bu yil oson o‘yinlar bo‘lmasligini isbotlamoqda. Bo‘lajak bellashuv ham bundan mustasno bo‘lmaydi, albatta.

Umuman olganda, “Navbahor”ga qarshi barcha jamoalar o‘zgacha ishtiyoqda maydonga tushadi va safargi raqib - “Buxoro” ham jamoamizga munosib qarshilik ko‘rsatishga intiladi. 

Shunday bo‘lsada, birinchi davraning so‘nggi o‘yinida maydonga g‘alaba ishtiyoqida tushib, buni amalga oshirish uchun barcha imkoniyatimizni ishga solamiz.

Boisi, davralar oralig‘idagi  tanaffusga peshqadam sifatida chiqib ketmoqchimiz va mazkur imkoniyat o‘z qo‘limizda. Buning uchun esa buxoroliklarni mag‘lubiyatga uchratishimiz lozim.

Shunda muxlislarimiz ham stadiondan uylariga yaxshi kayfiyatda qaytishadi.    

Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.

“Navbahor” joriy mavsumda o‘zi qatnashadigan barcha musobaqalarda zafar quchishni maqsad qilgan.   

Buni amalga oshirish uchun biz – futbolchilar qo‘ldan kelganicha harakat qilamiz.