Ertaga — 6 iyul, payshanba kuni "Neftchi" jamoasi "Ural" FK bilan xalqaro o‘rtoqlik uchrashuvida ishtirok etadi.

Raqib haqida qisqacha ma’lumot:

"URAL" FK (Ekaterinburg) sobiq Sovet ittifoqi davrida, ya’ni 1930 yilda tashkil topgan bo‘lib, "Uralmashstroy", "Uralmashzavod","Avangard", Mashinostroitel",   va" Uralmash" nomi ostida faoliyat olib borgan. 2003 yildan boshlab shu kunga qadar jamoa nomi "Ural" deb yuritilmoqda. Yekaterinburg klubi hozirgi kunda Rossiya Premyer ligasi vakili sifatida musobaqada qatnashib kelmoqda.

"Ural" FKning eng yuqori yutuqlari:

1991 yil—SSSR Birinchi liga (3-o‘rin)
1993, 1995 yil—Rossiya Oliy ligasi (8-o‘rin)
1996 yil—Intertoto Kubogida ishtirok etish
2006 yil—Rossiya birinchi divizioni (3-o‘rin)
2007 yil—Rossiya Kubogi yarim finaliga chiqish
2012, 2013 yil — FNL Kubogi g‘olibi
2013 yil — FNL chempioni
2016 yil — Premyer ligada (8-o‘rin)
2017, 2019 yil—Rossiya Kubogi final ishtirokchisi

Jamoa uy uchrashuvlarini 35 ming tomoshabingga mo‘ljallangan "EKATERINBURG ARENA" stadionida o‘tkazib kelmoqda. Jamoa bosh murabbiyi sifatida Yuriy Matveev faoliyat yuritayapti.

"Ural" futbol klubining rasmiy ma’lumotlariga ko‘ra, jamoa tarkibida o‘z vaqtida "Neftchi" PFKning bosh murabbiyi Vitaliy Grigoryevich Levchenko ham futbolchi sifatida faoliyat yuritganligi ko‘rsatib o‘tilgan. Yekaterinburg shahrining asosiy jamoasida to‘p surgan o‘zbekistonlik futbolchilardan esa Vladimir Radkevich, Yevgeniy Safonov, Vladimir Shishelov  hamda Oston O‘runov ham sanab o‘tilgan.

Eslatib o‘tamiz, "Neftchi" - "Ural"  xalqaro o‘rtoqlik bahsi "Istiqlol" stadionida soat 20:00 da boshlanadi.

Ushbu jamoalar o‘rtasidagi javob uchrashuvi esa Yekaterinburg shahrida o‘tkaziladi. Javob bahsi 13 iyul sanasiga belgilangan.