Эртага — 6 июль, пайшанба куни "Нефтчи" жамоаси "Урал" ФК билан халқаро ўртоқлик учрашувида иштирок этади.

Рақиб ҳақида қисқача маълумот:

"УРАЛ" ФК (Екатеринбург) собиқ Совет иттифоқи даврида, яъни 1930 йилда ташкил топган бўлиб, "Уралмашстрой", "Уралмашзавод","Авангард", Машиностроитель",   ва" Уралмаш" номи остида фаолият олиб борган. 2003 йилдан бошлаб шу кунга қадар жамоа номи "Урал" деб юритилмоқда. Екатеринбург клуби ҳозирги кунда Россия Премьер лигаси вакили сифатида мусобақада қатнашиб келмоқда.

"Урал" ФКнинг энг юқори ютуқлари:

1991 йил—СССР Биринчи лига (3-ўрин)
1993, 1995 йил—Россия Олий лигаси (8-ўрин)
1996 йил—Интертото Кубогида иштирок этиш
2006 йил—Россия биринчи дивизиони (3-ўрин)
2007 йил—Россия Кубоги ярим финалига чиқиш
2012, 2013 йил — ФНЛ Кубоги ғолиби
2013 йил — ФНЛ чемпиони
2016 йил — Премьер лигада (8-ўрин)
2017, 2019 йил—Россия Кубоги финал иштирокчиси

Жамоа уй учрашувларини 35 минг томошабингга мўлжалланган "ЕКАТЕРИНБУРГ АРЕНА" стадионида ўтказиб келмоқда. Жамоа бош мураббийи сифатида Юрий Матвеев фаолият юритаяпти.

"Урал" футбол клубининг расмий маълумотларига кўра, жамоа таркибида ўз вақтида "Нефтчи" ПФКнинг бош мураббийи Виталий Григорьевич Левченко ҳам футболчи сифатида фаолият юритганлиги кўрсатиб ўтилган. Екатеринбург шаҳрининг асосий жамоасида тўп сурган ўзбекистонлик футболчилардан эса Владимир Радкевич, Евгений Сафонов, Владимир Шишелов  ҳамда Остон Ўрунов ҳам санаб ўтилган.

Эслатиб ўтамиз, "Нефтчи" - "Урал"  халқаро ўртоқлик баҳси "Истиқлол" стадионида соат 20:00 да бошланади.

Ушбу жамоалар ўртасидаги жавоб учрашуви эса Екатеринбург шаҳрида ўтказилади. Жавоб баҳси 13 июль санасига белгиланган.