Transfer oynasi ajoyib yangiliklarni yetkazishda davom etmoqda. Klublar kelishuvlarni rasman e’lon qiladi, ommaviy axborot vositalari esa bitimlarning qiziqarli va ba’zan yashirin tafsilotlarini taqdim etadilar. Biz siz uchun 5 iyul uchun asosiy ma’lumotlarni to‘pladik.
Di Mariya 13 yil avval tark etgan klubiga qaytdi
35 yoshli jahon chempioni - 2022 so‘nggi mavsumni "Yuventus"da o‘tkazdi. Biroq klub argentinalik futbolchi bilan yangi shartnomani uzaytirmaslikka qaror qildi, garchi Anxel maydonga tushganida doim foyda keltirgan bo‘lsa ham. Di Mariya Yevropani tark etmay, “Benfika”ga qaytishga qaror qildi. Anxelning Yevropadagi faoliyati aynan Portugaliyada boshlangan. "Benfika" tarkibida u 2009/2010 yillarda Portugaliya chempioni va 2008/2009 va 2009/2010 yillarda Liga kubogi sohibi bo‘lgan.
"Tottenxem" o‘zining asosiy “boyligini” qo‘yib yubormaydimi?
The Guardian nashrining xabar berishicha, londonliklar jamoa yetakchisi Xarri Keynga yangi shartnoma taklif qilishgan. 29 yoshli hujumchi "Bavariya"ga o‘tishni xohlaydi, ammo "Tottenxem" futbolchini qo‘yib yubormaydi. Keynning "shporlar" bilan shartnomasi 2024 yilning yoziga qadar amal qiladi. Demak, londonliklar oldida uchta yo‘l bor: Xarrini katta pulga sotish, shartnomani uzaytirish yoki keyingi yil uni tekinga qo‘yib yuborish. Biroq hujumchining o‘zi transfer oynasi ochiq ekan, yangi shartnoma bo‘yicha muzokaralar olib borishni istamayapti. Sizningcha, "Tottenxem" sardorni saqlab qola oladimi?
Manchester yana bir top transferini e’lon qildi
"Manchester Yunayted" o‘zining birinchi yirik yozgi transferini e’lon qildi. Mankunianliklar Meyson Mauntning transferini rasman e’lon qilishdi. 24 yoshli futbolchining "Chelsi" bilan shartnomasi tugashiga bir yil qolgandi. U 2005 yildan buyon “ko‘klar” safida edi va kattalar jamoasida 197 ta o‘yinda maydonga tushgan. Futbolchi klub uchun ramziy 7-raqamni oldi. Maunt “MYU”da muvaffaqiyat qozona oladimi?
"Spartak" Shomurodovga qiziqish bildirmoqda
"Spartak" hujumni kuchaytira oladigan futbolchilarni qidirmoqda. Lega xabariga ko‘ra, klub "Roma" hujumchisi Eldor Shomurodovga qiziqish bildirgan. Biroq 28 yoshli o‘zbekistonlik futbolchi RPLga qaytish taklifini rad etdi. Avvalroq Shomurodov Rossiyaning “Rostov” klubida (2017-2020) o‘ynagan, keyin esa Italiyaning “Jenoa” klubiga ko‘chib o‘tgandi. Hujumchiga bo‘lgan huquqlar "Roma"ga tegishli, ammo u 2022/2023 yilgi mavsumni "Spesiya" tarkibida o‘tkazdi. Shomurodovning “Roma” bilan shartnomasi 2026 yilning yozida yakuniga yetadi.
"Barselona"ning yozgi ikkinchi transferi
"Barsa" o‘zining rasmiy saytida himoyachi Inigo Martines bilan shartnoma imzolaganini e’lon qildi. 32 yoshli futbolchi bilan shartnoma 2025 yilning 30 iyuniga qadar tuzilgan. Himoyachining "Barselona" bilan shartnomasida tovon puli ko‘rsatilgan - 400 million yevro. U Ispaniya terma jamoasi safida 20 ta o‘yin o‘tkazgan.
Chaglar Soyunju
Madridning “Atletiko” klubi “Lester”ning sobiq himoyachisi Chaglar Soyunju bilan shartnoma imzoladi. 27 yoshli futbolchi "tulkilar" bilan shartnomasini yakunladi. Shuning uchun "Atletiko" yaxshi markaziy himoyachini tekinga oldi. Soyunju "Lester"da 2018 yilning yozidan buyon o‘ynamoqda. O‘shanda klub uni Germaniyaning "Frayburg" klubidan 21 million yevro evaziga o‘z safiga qo‘shib olgan edi.
“PSJ” prezidentidan Mbappe haqida muhim xabarlar
Asosiy yozgi doston davom etmoqda. Kilian Mbappening kelajagi haqidagi hikoya hamon chalkashligicha qolmoqda. Futbolchi yana bir yil Parijda qoladimi, “Real”ga o‘tadimi yoki “PSJ” bilan shartnomani uzaytiradimi, hozircha aniq emas. Vaziyatni parijliklar prezidenti Nosir Al-Xelayfi izohladi: “Mening pozisiyam juda aniq. Har safar takrorlashni xohlamayman: biz Kilian qolishini istaymiz. Ammo Kilianning o‘zi qolishni istasa, yangi shartnoma imzolashi kerak. U dunyoning eng yaxshi futbolchisi, u tekinga keta olmaydi, bu mumkin emas”, dedi jamoa rahbari.
