APLda yangi mavsum uchun tayyorgarlikni jiddiy boshlagan "Arsenal", "Chelsi", "Liverpul" hamda "Man Siti"ga yetarli raqobat to‘lqinini taqdim etish uchun "MYU" ham plankani baland olgan. Yozning shu paytgacha amalga oshgan eng muhim transferi sifatida Meyson Mauntni misol qilib keltirish mumkin. O‘tgan mavsum "Chelsi" juda ham nostabil o‘yin o‘tkazdi. Jamoada yaqqol ajralib turgan lider yo‘q edi. Biroq Maunt har qachon bo‘lmasin, o‘ziga yuklatilgan vazifani maksimal bajarishga urinib keldi. Uning "Yunayted"da istiqboli katta. Quyida Mauntning alohida jihatlariga to‘xtalib o‘tamiz.
"Chelsi"da o‘tgan mavsum Maunt APL doirasida bor yo‘g‘i 5 ochko jamg‘ardi. Bu undan oldingi yil bilan solishtirganda (21) ancha past ko‘rsatkich hisoblanadi. O‘rtacha har bir o‘yinda 1,6 marta vaziyat yaratgan (o‘tgan yili - 2.2), 1,8 marta zarba bergan (o‘tgan yili - 2,9). Shunday bo‘lishiga qaramay Mauntda to‘p bilan ajoyib muomala qilish ko‘nikmasi pasaymagan. Quyida to‘pga tegishlar ko‘rsatkichi bo‘yicha o‘tgan mavsum hamda undan oldingi mavsumning solishtirma jadvaliga guvoh bo‘lishingiz mumkin.
Frenk Lempard Mauntga ilk imkoniyatni taqdim etgan murabbiy hisoblanadi. Biroq Meysonni ko‘pincha Tuxel davrida ochildi deb aytish mumkin. U nemis mutaxassisining 3-4-2-1 sxemasida "nayzaning uchi" bo‘lib berdi, ya’ni 10 lik vazifasida ancha sermahsul edi. Ba’zida tarkibdan tushib qolgan paytlari ham bo‘ldi. Biroq u o‘zida har doim motivasiya topa olgan. 2020-21 yilgi mavsumda, ya’ni Lempardning so‘nggi 6, Tuxelning esa dastlabki 18 oyi davomida Maunt "aristokratlar"ning eng muhim o‘yinchisiga aylandi. Bu vaqt ichida jamoa YECHL bosh sovrinini qo‘lga kiritdi va Maunt finalda fantastik harakat qildi. Ingliz shuningdek, so‘nggi ikki mavsum davomida ligada vaziyatlar yaratish borasida 5-o‘rinni egalladi (145). Undan oldingi o‘rinlarni KDB, Bruno, Trent hamda Son egallagandi. Maunt jami assistlar bo‘yicha 8-pog‘onadan joy oladi (15), biroq kutilgan uzatmalar soni bo‘yicha kuchli to‘rtlikka kirgan (13,8). Bu borada Xarri Keyn 9,2 kutilayotgan miqdordan 23 ta assist bergan bo‘lsa, Robertson 11,4 ta ko‘ringan imkoniyatni 17 taga ko‘paytira olgan.
Maunt xavfli zarba bilan tugovchi hujumlarni yakunlashda ham APLda 7-o‘rinni band etdi. U shuningdek, eng kamida 3 ming daqiqa vaqt maydonga tushgan futbolchilar orasida peshqadam bo‘lib turibdi. O‘tgan ikki mavsum davomida XG hamda XAda eng yaxshi bo‘lib turgan o‘yinchilar o‘rtacha 0,2 ko‘rsatkichi qayd etgan: KDB, Bruno, Maxrez, Saloh, Grilish, Rafinya, Maunt. Bu vaqt oralig‘ida ligada aynan shu futbolchilar raqiblar uchun katta xavf tug‘dirib keldi. Penaltini chiqarib tashlagan holatdagi vaziyat yaratuvchilar bilan tanishib chiqishingiz mumkin. Shunga qaramay "Chelsi" yangi xaridlar oldida Meysonni keraksiz deb baholadi.
Buncha yaxshi raqamlari ham uning jamoasiga yordam bera olmagach, endi ketish payti keldi. U o‘tgan mavsum 38 bahsning 20 tasida asosiy tarkibda maydonga tushdi. Biroq u bundan ham ko‘prog‘iga qodir. Ten Xagning 4-3-3 sxemasida ham ingliz o‘zini qulay his qila oladi albatta. 8 lik rolini Eriksendan tortib olishi kutilyapti. Agar murabbiy undan 10 lik vazifasida foydalansa, Maunt Reshford hamda Sancho bilan ajoyib trio hosil qilishi mumkin. Agar jamoaga yangi hujumchi keladigan bo‘lsa, uni xuddi Angliya terma jamoasida bo‘lgani kabi hujumchi ortidagi muvaffaqiyatli rolida ham ko‘rishimiz mumkin.
Yusufbek Saydaliyev tayyorladi
