Ispaniyaning San Sebastyan shahrida o‘smirlar va yoshlar o‘rtasida 31-marta o‘tkazilayotgan “Donosti Cup – 2023” xalqaro turnirida ishtirok etgan Bekobodning “Metallurg U-17” jamoasi kuchli sakkiz jamoa safidan o‘rin egalladi. Shuni e’tirof etish kerakki, chorak finalga mazkur yosh toifasida xorijliklardan faqatgina O‘zbekiston jamoasi yo‘llanma oldi!

Bekobodlik yoshlar nimchorak finalda  Ispaniyaning kuchli jamoalaridan biri“Zestora FT U-19” jamoasiga qarshi maydonga chiqib, 2:1 hisobida zafar quchishdi. Gollarni Asror Shamsutdinov hamda Akobir Abdullajonovlar kiritishdi.

 Musobaqa muddati oxirlashib borayotganligi bois tashkilotchilar buguning o‘zida chorak final bahslarini ham o‘tkazishdi. Kunning ikkinchi yarmida hamshaharlarimiz turnirning uch karra chempioni “CFS Team A U19” jamoasiga qarshi maydonga tushishdi. Ispaniyaning grand jamoalari – “Atletiko” (Madrid), “Xetafe” hamda “Rayo Valyekano” yoshlar jamoalari o‘yinchilaridan tashkil topgan Madrid shahri terma jamoasi mahorat va tajriba borasida “Metallurg”dan ustun ekanligini isbotladi. Uchrashuv yoshlarimizdan ikki yosh katta bo‘lgan madridliklar foydasiga yakunlandi – 0:2.

“Donosti Cup – 2023” xalqaro turniridagi ishtirok “Metallurg U-12” hamda “Metallurg U-17” jamoalarimiz uchun katta tajriba maktabi vazifasini o‘tab berdi.