"Bayer" "Liverpul"ning 19 yoshli himoyachisi Lyuk Chembersga jiddiy qiziqish bildirmoqda. "Dorixonachilar" yosh futbolchini ijaraga olmoqchi, deya xabar beradi jurnalist Florian Plettenberg o‘zining Twitter sahifasida.
Manbaga ko‘ra, klublar o‘rtasida transfer bo‘yicha faol muzokaralar olib borilmoqda, biroq tomonlar o‘rtasida og‘zaki kelishuvga hali erishilgani yo‘q. Ular aynan futbolchining ijarasi masalasini muhokama qilishmoqda, biroq unga yosh ingliz himoyachisini to‘liq sotib olish variantini ham kiritish mumkin.
Transfermarkt internet portali 19 yoshgacha bo‘lgan Angliya terma jamoasi futbolchisining bozor qiymatini 300 ming yevroga baholamoqda. Yakunlangan 2022/2023 yilgi mavsumda Lyuk Chembers 21 yoshgacha bo‘lgan "Liverpul" tarkibida 32 ta o‘yinda maydonga tushib, bitta gol va 3 ta golli uzatmani amalga oshirgan.