"Vest Xem"ning sobiq sardori yuqori darajaga ko‘tarilish uchun shaylanmoqda
Deklan Rays: Global miqyosdagi yulduzmi yoki haddan tashqari bo‘rttirilgan futbolchimi? Deklan Rays Premyer-liganing joriy mavsumida eng ko‘p muhokama qilingan o‘yinchilaridan biri bo‘ldi. "Vest Xem" yarim himoyachisi ko‘plab klublar, jumladan "Manchester Siti", "Arsenal" va "Bavariya"ning e’tiborini tortdi. Biroq Angliya va Germaniya chempionlari 24 yoshli yarim himoyachi uchun kurashni tark etdi.
"Bolg‘achilar" o‘z sardori uchun juda yuqori narx so‘ramoqda - kamida 100 million funt, bonuslarni hisobga olmaganda albatta. Oxirgi xabarlarga ko‘ra, faqat "Arsenal" bu talablarni bajara oladi xolos. Konferensiyalar ligasi g‘olibi "Emireyts"ga ko‘chib o‘tishga tayyorgarlik ko‘rayotganda, ko‘pchilikda savol tug‘iladi: Rays haqiqatan ham bu pulga arziydimi? “Vest Xem” bosh murabbiyi Devid Moyes “ha” deya javob bergan:
"Shubhasiz, Deklan top futbolchi bo‘ladi. Agar u qachondir “Vest Xem”ni tark etsa, Buyuk Britaniyadagi transfer rekordiga aylanadi. Men u haqida hamma narsani aytdim deb o‘ylayman. U "Vest Xem" uchun juda muhim o‘yinchi, biz uni juda qadrlaymiz va uning jamoa uchun nimani anglatishini ko‘rishingiz mumkin. U haqiqatan ham yaxshi inson va biz uning borligidan zavqlanamiz”, - dedi mutaxassis o‘tgan mavsumda.
"Chempionlar ligasida o‘ynashni xohlayotganimga 100% aminman. Men bu haqda oxirgi 2-3 yildan beri gapiryapman. Men o‘z klubim uchun doimo yaxshi o‘ynayman va o‘zim uchun mazmunli bo‘lgan narsa uchun kurashmoqchiman. Men Chempionlar ligasida o‘ynaydigan va katta sovrinlar uchun kurashayotgan do‘stlarimga havas qilaman", - dedi Rays. Deklan tayanchda o‘ynaydigan pleymeyker. "Vest Xem" va Angliyada u odatda 4-2-3-1 sxemasida ikkinchi tayanch kuchi sifatida o‘ynaydi yoki yarim himoya triosining pastki zonasida "qora ishlar"ni bajaradi. Uning to‘psiz asosiy vazifasi himoyachilar uchun xavfsizlik to‘rlarini ta’minlashdir. Uning jamoasi to‘pga egalik qilganda, u birinchilardan bo‘lib hujumlarni tashkil qiladi.
Bunday o‘yinchini topish juda qiyin, shuning uchun "Arsenal" Raysni uzoq muddatga sotib olishni juda xohlaydi. "Manchester Siti"ga Fernandinyo ketganidan keyin bo‘shliqni to‘ldirish uchun uzoq vaqt kerak bo‘ldi va Rodri bunda asosiy qahramonga aylandi. O‘ziga o‘xshagan yana bir futbolchi Kazemiro o‘tgan mavsumda "Manchester Yunayted"ni o‘zgartirishda katta hissa qo‘shgan. Sifatli yarim himoyachilar jamoani birlashtiradi. Ular barqarorlikni keltirib chiqaradi. Ularni topish juda qiyin ekani ajablanarli emas. Raysning to‘p bilan ishlash qobiliyati so‘nggi mavsumlarda ancha yaxshilandi. O‘zining 2017/18 yilgi mavsumida u 90 daqiqada o‘rtacha 2,26 ta potensial golli uzatmani amalga oshirdi. Har bir keyingi mavsumlarda bu ko‘rsatkichlar yaxshilandi. 2021/22 yilgi mavsumda yarim himoyachi 90 daqiqada o‘rtacha 7,25 ta shunday ehtimoliy golli uzatmani amalga oshirgan. Deklan o‘z arsenalida turli xil uzatmalarga ega, ular qanot himoyachilariga qarata yo‘naltirilgan uzun uzatmalardan tortib hujumchilargacha bo‘lgan ajoyib paslarni o‘z ichiga oladi. Rays chinakam sifatli pleymeyker bo‘lib, o‘yinni tushunishni yuqori texnika bilan uyg‘unlashtirgan. Qolaversa, bu jismonan rivojlangan yarim himoyachi, unga munosib summani to‘lash achinarli emas.
Bundan tashqari, Rays himoyada qo‘shimcha variant hisoblanadi. Faoliyatini markaziy himoyachi sifatida boshlagan, bu hali ham bugungi o‘yinida o‘z aksini topmoqda. U o‘tgan mavsumda Premyer-ligada 63 marta to‘pni raqiblaridan olib qo‘ydi, bu ligadagi yaxshi natija hisoblanadi. Qolaversa, “Vest Xem” sardori Premyer-liganing eng yaxshi 10 nafar futbolchisi qatoriga kiradi. Yarim himoyachi havoda ham yaxshi harakat qiladi. Bunday mustahkam himoya bazasi bilan agar kerak bo‘lsa, u bemalol markaziy himoya holatiga qaytishi mumkin.
Rays o‘z pozisiyasida futbolchi uchun ham munosib to‘purarlik qobiliyatiga ega. Deklan o‘tgan mavsumda Premyer-liganing 37 o‘yinida 4 gol urdi va 2 ta golga assistentlik qilgan. U o‘zining sermahsul harakatlari bilan "bolg‘achilar"ga "Aston Villa" va "Lids"ni mag‘lub etishga, "Nottingem Forest" va "Bornmut"ni mag‘lub etishga va "Sautgempton"ga qarshi o‘yinda hisobni tenglashtirishga yordam berdi. Yarim himoyachi, shuningdek, jamoasiga Konferensiyalar ligasida g‘alaba qozonish va butun turnirni mag‘lubiyatsiz o‘tkazishiga yordam berdi.
Rays bor-yo‘g‘i 24 yoshda, biroq u Premyer-ligada 200 dan ortiq o‘yin o‘tkazgan va yirik turnirlarda, jumladan, Angliya MTJda ham tajribaga ega bo‘ldi. Deklan o‘tgan yozda Mark Noubl ketganidan keyin "Vest Xem" sardori lavozimini egalladi. U mas’uliyatdan qo‘rqmas, kerak bo‘lganda omadsiz o‘yinlardan so‘ng hamisha muxlislar oldiga chiqib, futbolchi va muxlislar o‘rtasidagi aloqani saqlab turardi. Rays hozirda eng yaxshi tayanch yarim himoyachilaridan biri bo‘ldi. Bundan tashqari, u ingliz bo‘lib, uning transfer qiymatini avtomatik ravishda oshiradi. Premyer-liga qoidalariga ko‘ra, liga asosini ingliz klublari tarbiyalanuvchilari tashkil etishi kerak. Shuning uchun ham Rays kabi eng yaxshi ingliz futbolchilari juda yuqori baholanadi. Bunday o‘yinchilar uchun juda ko‘p pul to‘lash kerak. Boshqa tomondan, faqat translyasiya huquqidan olingan rekord daromad tufayli, Premyer-ligadagi ko‘plab klublar, hatto kichikroq klublar ham sifatli o‘yinchilarni osonlik bilan sotib olishlari mumkin.
