"Manchester Yunayted" yarim himoyachi Meyson Mauntni sotib oldi. Jamoa, darvozabon Andre Onananing xaridiga yaqin turibdi. Ammo Erik ten Xag uchun o‘ta zarur bo‘lib turgan aplua bu hujumchidir. Anchadan beri Xarri Keyn va Viktor Osimxen "qizil iblislar" nazdida yirik nishon bo‘lib keldi. Ammo ular uchun nihoyatda ko‘p so‘ralmoqda. Shu sabab "MYU" o‘z e’tiborini boshqa hujumchilarga qaratishi lozim. Quyida ten Xagga besh tanlov beriladi. Ulardan biri mankunianliklar safiga kelishi mumkin.
Rasmus Xyoylunn
Yoshi: 21
Klubi: "Atalanta"
Yevropa futbolida navbatdagi porloq yulduz bo‘lishi kutilayotgan nomlardan biri bu "Atalanta" va Daniya terma jamoasi hujumchisi Rasmus Xyoylunndir. To‘p bilan yaxshi harakatlanadigan futbolchining Italiyaga kelganiga atigi bir yil bo‘ldi. Ammo shunday qisqa vaqt ichida u katta klublar nazariga tushdi. Bunga sabab Xyoylunning pressing, yarim himoya va bog‘lamlardagi unumli harakatlaridir. U o‘tgan mavsumda 9 ta golga mualliflik qilgan edi.
Dushan Vlaxovich
Yoshi: 23
Klubi: "Yuventus"
Yana bir A seriya vakili bu Vlaxovichdir. 23 yoshli hujumchi "Fiorentina" safida 98 ta o‘yinda 44 ta gol urgan. Ammo uning "Yuventus"dagi ishari unchalik ham o‘xshamayapti. Vlaxovich turinliklar safiga 70 million yevro evaziga o‘tgan. Ammo bu pullar hali oqlanmadi. Serbiya terma jamoasi a’zosi o‘tgan mavsumda 14 ta golga mualliflik qilgan edi. Vlaxovich shu yozda jamoasini yangilashi mumkin.
Benyamin Sheshko
Yoshi: 20
Klubi: "Leypsig"
Sheshkoni anchadan beri "MYU" jiddiy kuzatuvga olgan. Ko‘pchilik 20 yoshli hujumchi harakatlarini Xolandga qiyoslaydi. U "Zalsburg"dan 24 million yevroga xarid qilingandi. Bo‘y borasida maqtana oladigan futbolchi, havodagi kurashlarda katta ustunlikka ega. Sheshko ayni damda 50 millionga baholanmoqda.
Gonsalu Ramush
Yoshi: 22
Klubi: "Benfika"
Qatardagi mundial har doimgidek Portugaliya uchun omadli o‘tmadi. Eng yomoni, Ronaldu bilan jamoa bosh murabbiy o‘rtasida kelishmovchilik kelib chiqqani edi. Shunday tarang vaziyatda Ramush maydonga chiqdi. U Ronalduning o‘rnini bosa olishini isbot qilgan edi. "Benfika" safida 22 yoshli markaziy hujumchi 19 ta golga mualliflik qildi. Bemalol aytish mumkinki, Ramush "MYU"ning muammolarini hal qilishga qodir futbolchi.
Lautaro Martines
Yoshi: 25
Klubi: "Inter"
"Inter"dagi 5 yillik faoliyatidan keyin, Lautaro shu yozda boshqa klubga yo‘l olishi aytilmoqda. Argentinalik hujumchiga jiddiy da’vogar bu "Chelsi"dir. Bu turgan gap, albatta. Negaki, u o‘tgan mavsumda 28 ta golga mualliflik qilgandi. Erik ten Xag u uchun tez harakat boshlashi talab etiladi. Futbolchi ketishga rozi. Faqatgina uni ko‘ndirish va talab qilingan summani to‘lash kerak xolos. Aks holda, "Chelsi" Martinesni ilib ketishi mumkin.
ISMATOV J.
