Bir yarim mavsum davomida “Andijon” sharafini himoya qilgan iqtidorli yarim himoyachi Sherzod Esanovning “Olimpik” jamoasiga ijaraga berilishi munosabati bilan “Andijon” klubi bosh direktori Ulug‘bek Mirzayev shunday dedi:

“Sherzod Esanovni “Andijon” jamoasi 10 iyuldan boshlab mavsum oxirigacha “Olimpik” jamoasiga ijaraga berdi. Bundan avvalroq “Olimpik” klubidan Sherzodni ijaraga olish bo‘yicha jamoa rahbariyati rasmiy murojaat bilan chiqqandi.

Esanovni Osiyo chempioni va Argentinada o‘tgan jahon chempionati qatnashchisi ekanini barcha yaxshi biladi. “Andijon” safida ham u o‘zining baland bo‘yligi, savlati kattaligi bilan ham raqiblariga muammolar tug‘dirish va bosim o‘tkazish bo‘yicha uning yaxshigina qobiliyati mavjud.

Aslida bunday o‘yinchilar har doim jamoamizga kerak. Lekin shunga qaramay, “Olimpik”ning maqsadi O‘zbekiston olimpiya terma jamoasining negizida tashkil etilib, 2024 yili Parijda bo‘ladigan Olimpiada musobaqasiga yo‘llanmani qo‘lga kiritish ekanligidan kelib chiqqan holda “Andijon” klubi hamma vaqt terma jamoa manfaatini ustun qo‘yadi va Sherzod Esanovni hech qanday ikkilanishlarsiz “Olimpik” jamoasiga mavsum oxiriga qadar ijaraga berishga qaror qabul qildi.

Bunday holatlarda terma jamoa manfaatlari biz uchun hamma narsadan afzal hisoblanadi. To‘g‘ri, biz bir futbolchini yo‘qotgan bo‘lsak-da, ammo bu bilan terma jamoamiz va o‘zbek futboli obro‘si yanada yuksalishiga hissa qo‘shdik, deb o‘ylaymiz. Chunki Esanov o‘z ustida yanada yaxshiroq ishlab terma jamoamizni Parij Olimpiadasiga yo‘l olishiga hissasini qo‘sha olsa, bunda “Andijon” jamoasining ham o‘ziga yarasha ulushi bor deb hisoblaymiz. Shuning uchun Sherzodni “Olimpik” klubiga ijaraga berishni ma’qul ko‘rdik va bundan hech qanday afsuslanishlar bo‘lmadi”, - deya ta’kidladi, Ulug‘bek Abdusattorovich.  

“Andijon” matbuot xizmati.