Tojikistonda yozgi o‘quv-mashg‘ulot yig‘inini o‘tkazayotgan “Andijon” jamoamiz hozirda bor e’tiborini ikkinchi davraga munosib tayyorgarlik ko‘rishga qaratgan.

Tabiiyki, endilikda futbolchilardagi ma’suliyat yanada ortadi. Chunki ikkinchi davrada bundan-da muhim uchrashuvlar kutmoqda.

Shu o‘rinda jamoa yetakchilaridan biri, mehnatkash futbolchi Farhod Bekmurotov "Andijon" matbuot xizmatiga birinchi davradagi ishtirok, ikkinchi davraga tayyorgarlik va bu yerdagi sharoitlar xususida o‘z fikrlari bilan o‘rtoqlashdi.

“Birinchi davra yaxshi o‘tdi. Buni natijalarimiz ham aytib turibdi. Xudoga shukr, qilgan mehnatlarimizga yarasha mukofotlanyapmiz. Bundan-da yaxshiroq natija bo‘lishi ham mumkin edi. Lekin shunisiga ham shukr. Bu – futbol, kimdir yutadi, kimdir yutqazadi. Birinchi davrada yo‘qotgan ochkolarimizni ikkinchi davrada yig‘ib, yanada yuqoriroq natija qilishga va muxlislarimizni xursand etishga harakat qilamiz.

Ha, to‘g‘ri aytasiz, mas’uliyat yanada yuqori bo‘ladi. Shundoq ham mas’uliyat kuchli. Chunki bunday talabchan muxlislar bizdan faqat g‘alaba kutishadi. Shuning uchun bor kuchimiz bilan mashg‘ulotlarda qattiq mehnat qilyapmiz. Xudo xohlasa, 2-davrani ham yaxshi o‘tkazamiz, degan umiddaman.

Sharoitlar yaxshi. Ikki mahaldan mashg‘ulot qilish uchun hamma narsa bor. Maydon va trenajyor zal, hammasini yaxshi holatda qilib berishga harakat qilishyapti. Ishqibozlarimiz bizni qo‘llab-quvvatlab turishdan charchashmasin. Oila-a’zolarini baxtiga doim sog‘-salomat bo‘lishsin”, - deydi Bekmurotov.