20 yillik tanaffusdan keyin "Paxtakor" Olma-Otada "Qayrat" bilan Markaziy Osiyo derbisida ishtirok etadi.

Oxirgi marta rasmiy bellashuvda jamoalar Olma-Otada 1990 yil 15 may kuni SSSR chempionati birinchi liga doirasida duch kelishgandi. O‘sha bahs 1:0 hisobida "Paxtakor" g‘alabasi bilan yakunlangan. Igor Shkvirin kiritgan to‘pga mezbonlar javob qaytara olishmagan.

So‘nggi marta Olma-Otada o‘rtoqlik o‘yinida 2003 yil qozoq futbolining 90 yilligiga bag‘ishlab o‘tkazilgan uchrashuvida "Qayrat" 2:1 hisobida zafar quchgan. Iyul oyida bo‘lib o‘tgan bahsda mezbonlardan Tlexugov va Qurbonov, jamoamizdan Kapadze gol urgan. Ushbu yilning fevral oyida Toshkentdagi o‘rtoqlik bahsida "Paxtakor" 4:3 hisobida g‘alaba qozongandi.

Olma-Otadagi oxirgi rasmiy o‘yin protokoli
"QAYRAT" - "PAXTAKOR" - 0:1 (0:1).
1990 yil 15 may. Olma-Ota. Markaziy stadion. 8000 tomoshabin.
Hakam: A.Spirin (Moskva).
"Qayrat": Grozdov (Egoshkin), Timofeev, Pinchukov, Neyshteter, Slambekov, Ahmedov (Rikov), Bogatiryov, Aymanov, Mixel, Kariyev, Klimov (Popandopulo).
"Paxtakor": Yanovskiy, Miklyayev, Bilolov, Qosimov, Denisov, Oganesyan, Bondarenko, Pyatniskiy, Abduraimov (Galiyev), Shkvirin, Sharipov (Ro‘zimov).
Gol: Shkvirin, 27 - 0:1.

Rasmiy o‘yinlarda jami 60 to‘qnashuv kuzatilgan. 20 uchrashuvda "Paxtakor", 26 bahsda "Qayrat" g‘alaba qozongan. 14 bellashuv durang bilan tugagan. "Sherlar" 70 to‘p kiritgan holda o‘z darvozasidan 81 gol o‘tkazib yuborgan.

O‘zbek va qozoq futboli bayroqdor klublari sanalgan "Paxtakor" va "Qayrat" o‘rtoqlik o‘yinlari o‘tkazish borasida kelishuvga erishib, bu yo‘lda dastlabki qadam Toshkentda tashlangandi. Endi esa Olma-Otada ikki buyuk tarixga ega klub qozoq futboli ishqibozlari ko‘z o‘ngida maydonga tushadi.