Kamerun futbol federatsiyasi prezidenti Samuel Eto’O kelishilgan o‘yinlarni tashkil qilishda gumonlanmoqda.

18 iyul kuni Kamerun futbol federatsiyasi rahbarining “Viktoriya Yunayted” klubi prezidenti bilan telefondagi suhbati e’lon qilindi. 2023 yilning yanvar oyida bo‘lib o‘tgan suhbatda Eto’O klubning Kamerun Oliy ligasiga chiqish maqsadini tilga olgan. Ma’lumot uchun, o‘sha vaqtda “Viktoriya Yunayted” 2-divizion turnir jadvalining quyi qismidan joy olgandi.

““Opopo” (“Viktoriya Yunayted” laqabi) birinchi divizionga chiqishi lozim. Bu bizning maqsadimiz. Bu bizning federasiya. To‘rt kishimiz: biz va yana 2 kishi. “Viktoriya Yunayted” yuqoriga chiqadi”, — degan Eto’O.

Mavsum yakunidagi natijalarga ko‘ra, “Stad de Bertua” federatsiya tomonidan diskvalifikasiya qilingach, 2-o‘rinni egallagan jamoa sifatida “Viktoriya Yunayted” Oliy divizionga ko‘tarilgan.

Shu o‘rinda Eto’O kelishilgan o‘yinlarga aloqadorligini rad etgan.

“Suhbatda men o‘z vazifamizni bajarmayotganimiz uchun pullarini olib, futboldan ketishni xohlayotgan “Opopo” prezidentini himoya qilganman.

Men hakamlar assotsiasiyasi prezidentiga qo‘ng‘iroq qildim va unga: “Ehtiyot bo‘l! Bu odam futbolga juda ko‘p pul sarflaydi, shuning uchun jamoasi chempionatning eng yaxshilaridan biri bo‘lishini xohlayotgan odamni hakamlar yo‘qotmasligi kerak”, degandim”, — aytib o‘tdi Samuel.

Avvalroq, Samuel Eto’Oning qizi otasiga qamoq jazosi berilishini so‘ragani xabar qilingandi. Sobiq futbolchi 5 yil mobaynida qiziga aliment to‘lamay kelgan.