"Atalanta" "Manchester Yunayted" hujumchi Rasmus Xyoylunn uchun taklif qilmoqchi bo‘lgan summaga rozi bo‘lmadi.

Sky Sports News nashri xabariga ko‘ra, 20 yoshli futbolchining shaxsiy shartlari bo‘yicha hech qanday muammo yo‘q, ammo "Atalanta" uni 70 million yevro va qo‘shimcha maosh sifatida 10 million yevroga baholamoqda, bu "Manchester Yunayted" uchun juda ko‘p.

Qayd etilishicha, ingliz klubi moliyaviy qiyinchiliklar tufayli hujumchi uchun 40 million yevrodan 60 milliongacha taklif qilishga tayyor. "Atalanta" murosaga kelishni istamaydi.

Manba xabariga ko‘ra, "Manchester Yunayted" "Ayntraxt" hujumchisi Randal Kolo Muani bo‘yicha muzokaralar olib bormoqda.

Xyoylunn “Atalanta” safida 2022 yilning avgustidan buyon o‘ynab kelmoqda. 2022/23 yilgi mavsumda hujumchi barcha musobaqalarda 34 ta o‘yinda maydonga tushib, 10 ta gol urdi va 4 ta golli uzatmani amalga oshirdi.