Tajribali yarim himoyachi Azimjon Ahmedov yozgi transfer oynasi davrida yana sevimli jamoasi “Navbahor”ga qaytib, “lochinlar” bilan shartnoma imzoladi.

Azimjon Ahmedov 1992 yilning 4 yanvarida Namangan viloyatining Namangan tumanida tavallud topgan. Namangan futboli tarbiyalanuvchisi.

Futbolchilik faoliyati davomida “Navbahor” (Namangan, 2010-2015, 2019-2022 yillar) va “Paxtakor” (Toshkent, 2016-2018 yillar) jamoalarida to‘p tepgan.

Shuningdek, Ahmedov 2016 yildan buyon O‘zbekiston milliy terma jamoasiga nomzod futbolchi sanaladi va milliy termamiz tarkibida ko‘plab o‘yinlarda maydonga tushgan.
Tajribali yarim himoyachi joriy mavsumning 1-davrasini “Turon” (Yaypan)da o‘tkazib, yaypanliklar tarkibida Superliga bahslarida 9 ta, O‘zbekiston kubogi uchrashuvlarida esa 3 ta o‘yinda maydonga tushdi.

"Biz Azimjon Ahmedovga jamoamizda omad yor bo‘lib, chiroyli o‘yinlari va gollari bilan “Navbahor” muxlislarini xursand etishi, shuningdek, “lochinlar”ning zafarlariga munosib hissa qo‘shishini tilab qolamiz." - deyiladi "Navbahor" saytida.