Joan Laporta Usmon Dembelening transferiga yaqin turgan "PSJ"ning xatti-harakatlaridan norozi.

COPE'ning ma’lumotlariga ko‘ra, "Barselona" prezidenti vingerni qo‘lga kiritish niyatida "PSJ"dan juda g‘azablangan. Laporta Dembeleni qolishga ishontirmoqchi bo‘ldi, ammo bunga erisha olmadi. Endi kataloniyaliklar parijliklarga "urush" e’lon qilishni rejalashtirmoqda, deydi Yelena Kondis. Bu nimani nazarda tutayotgani aniqlanmagan.

Bugun "Barselona" Usmonni saqlab qolish uchun oxirgi marta urinib ko‘radi - Xavi jamoa uchun qanchalik muhimligini eslatish uchun u bilan uchrashuv tayinladi.

Shunga qaramay, "Barselona" pessimistik va Dembelening jamoani tark etishi mumkinligiga ishonmoqda.

Avvalroq "PSJ" Dembele bilan 5 yillik shartnoma borasida kelishib olgani va "Barsa"ga 50 million yevro tovon puli to‘lashga tayyorligini aytgani ma’lum bo‘lgandi. Endi hammasi "PSJ'ning harakatlari tezligiga bog‘liq - 1 avgustdan boshlab "Barselona" vingeri narxi ikki barobar ortadi.

26 yoshli o‘ng qanot hujumchisi o‘tgan mavsumda 35 o‘yinda 8 gol urdi va 9 golga assistentlik qildi.