Bugun, 2 avgust kuni Ayollar o‘rtasidagi Jahon chempionati – 2023da Yamayka va Braziliya terma jamoalari to‘qnash kelishdi. Melburndagi (Avstraliya) "AAMI Park – Melburn Rektangular" stadionida "F" guruhi 3-tur o‘yini bo‘lib o‘tdi.

Braziliyaliklar o‘yin va statistik ustunlikka ega bo‘lishdi, ammo vaziyatlarni golga aylantira olishmadi. Uchrashuv golsiz durang (0:0) bilan yakunlandi.

Shu tariqa, Braziliya terma jamoasi 3 ta o‘yinda 4 ochko jamg‘ardi. Bu 2023 yilgi ayollar o‘rtasidagi jahon chempionatining pley-off bosqichiga chiqish uchun yetarli bo‘lmadi. Braziliyaliklar guruhda Yamayka (5 ochko) va Fransiyadan (7 ochko) keyin uchinchi o‘rinni egalladi. Braziliya bilan birga guruhda birorta ham ochko jamg‘ara olmagan Panama terma jamoasi so‘ng turnirni tark etadi.

2023 yilgi ayollar o‘rtasidagi Jahon chempionati 20 iyuldan 20 avgustgacha Yangi Zelandiya va Avstraliyada bo‘lib o‘tadi. Qo‘shma Shtatlar amaldagi jahon chempioni hisoblanadi. Amerikaliklar to‘rt marta jahon chempioni bo‘lishdi.