«Real Madrid» joriy yoz o‘z qaramog‘idagi o‘rinbosarlar jamoasi - «Kastilya» yulduzlari ortidan binoyidek qo‘shimcha daromadga ega chiqishi mumkin.
Binobarin, bu jamoa o‘tgan mavsum yakuni bo‘yicha Segundaga chiqolmadi, tarkibida esa yuqori darajali o‘yinlarga tayyor bir qator iqtidorlar bor. Faqat shunisi borki, ayni holatda ularga «Real»ning o‘zida bo‘sh joy yo‘q. Demak, «Qirollik klubi» rahbariyati bu holatda muqobil variantni tanlab, o‘z tarbiyalanuvchilarini transferlar bozorida pullashi mumkin. Aytish joiz, bu borada ayrim kelishuvlar rasmiylashtirildi ham. Xo‘sh, gap aynan qaysi iqtidorlar haqida ketmoqda?
Serxio ARRIBAS (yarim himoyachi). «Kastilya» tarkibidagi eng qimmat aktiv. Madridliklar uni 10 million yevro evaziga qo‘yib yuborishga tayyorlar, lekin 50 foiz huquqini o‘zlarida saqlab qolish sharti bilan. Ikkinchi variant - shunchaki, ijara safari.
Rafa MARIN (markaziy himoyachi). 21 yoshli futbolchi La Liganing bir qator jamoalari e’tiborida turibdi. Qolaversa, unga Ispaniyadan tashqarida ham qiziqish yo‘q emas. «Madrid»ning Rafa transferini qanchaga baholayotgani esa ma’lum emas.
Marvin PAK (qanot himoyachisi). «Las-Palmas»da 1 yillik ijara muddatini o‘tagan futbolchiga «Rayo Valyekano» befarq emas. «Madrid» esa bu yigit transfer huquqi 50 foizi uchun 2 million yevro so‘ramoqda. Demak, klubda Pak kelajagiga umid hali so‘ngan emas. Aytgancha, «Real» Fran Garsiyani yaqinda xuddi shunday shart asosida sotdi.
Aleks XIMENES (lateral). Bu futbolchi faoliyatini «Milan»da davom ettiradi - ijara. To‘g‘ri, Italiya klubida keyinchalik Ximenes transferini to‘liq sotib olish huquqi bor.
Karlos DOTOR (yarim himoyachi). «Kastilya» sardoriga La Liga klublaridan talab katta edi. Oxirgi ma’lumotlarga qaraganda, Dotor yakunda «Selta» taklifini qabul qildi va vigoliklar endi uning uchun «Real»ga 3 million yevro to‘lashadi. Shuning barobarida Karlos transferining 50 foiz huquqi «Madrid» ixtiyorida qoladi.
