Braziliyalik hujumchi Artur Kabral "Fiorentina"dan "Benfika"ga o‘tadi. Bu haqda Fabrisio Romano xabar bermoqda.

Transfer summasi 20 million yevroni tashkil qiladi, yana 5 millioni bonuslar ko‘rinishida taqdim etiladi. Shartnoma shartlari allaqachon kelishib olindi, hafta oxirida Kabral yangi klubida tibbiy ko‘rikdan o‘tadi.

O‘z navbatida, "Fiorentina" braziliyalikning o‘rnini bosadigan futbolchini allaqachon topib bo‘lgan. "Binafsharanglar" Kabral transferidan tushgan mablag‘ni 22 yoshli "River Pleyt" hujumchisi Lukas Beltran bilan shartnoma imzolash uchun qayta sarmoya qilishni rejalashtirmoqda. Italiya futbol federasiyasi ushbu futbolchini fuqarolikka qabul qilinishi mumkin bo‘lgan nomzod sifatida ko‘rmoqda.

Artur Kabral "Fiorentina"da bir yarim yil o‘tkazdi. Bu vaqt ichida u barcha musobaqalarda 64 ta o‘yin o‘tkazib, 19 ta gol urdi va 4 ta golli uzatmani amalga oshirdi.