Бразилиялик ҳужумчи Артур Кабрал "Фиорентина"дан "Бенфика"га ўтади. Бу ҳақда Фабрицио Романо хабар бермоқда.

Трансфер суммаси 20 миллион еврони ташкил қилади, яна 5 миллиони бонуслар кўринишида тақдим этилади. Шартнома шартлари аллақачон келишиб олинди, ҳафта охирида Кабрал янги клубида тиббий кўрикдан ўтади.

Ўз навбатида, "Фиорентина" бразилияликнинг ўрнини босадиган футболчини аллақачон топиб бўлган. "Бинафшаранглар" Кабрал трансферидан тушган маблағни 22 ёшли "Ривер Плейт" ҳужумчиси Лукас Белтран билан шартнома имзолаш учун қайта сармоя қилишни режалаштирмоқда. Италия футбол федерацияси ушбу футболчини фуқароликка қабул қилиниши мумкин бўлган номзод сифатида кўрмоқда.

Артур Кабрал "Фиорентина"да бир ярим йил ўтказди. Бу вақт ичида у барча мусобақаларда 64 та ўйин ўтказиб, 19 та гол урди ва 4 та голли узатмани амалга оширди.