«Kalyari» - «Palermo» o‘yinini ko‘rmaganlar, albatta, Shomurodov qanday harakat qilgan ekan, deb qiziqadi. Shuni aytib ketmoqchiman.

Ranyeri uni 85-daqiqada hisob 0:0 bo‘lgan payt maydonga tushirdi. Asosiy vaqtda o‘zini ko‘rsatishga ulgurmadi. O‘zi uchrashuvdagi eng qiziq voqealar aynan ekstra bo‘limlarda boshlandi.

Dastlabki 15 daqiqalikda Eldor asosan pressingda faol bo‘ldi. To‘psiz aktiv harakat qildi. Ikkinchi ekstra-taymda esa o‘ziga bo‘lgan ishonchi ortdi. Hujumdagi sheriklari bilan kombinasiyalar yuzaga keltirdi. Havodan kelayotgan to‘plarni qabul qilib, aniq paslar berdi. Yashirin to‘qqizlikdek o‘ynab bo‘sh zonalar yuzaga keltirdi. Biroq o‘zi darvozaga aniq tepish imkoniyatiga ega bo‘lmadi.

«Kalyari» 100-daqiqada oldinga chiqdi. 121-daqiqada «Palermo» hisobni tenglashtirdi. Hakam 2 daqiqa qo‘shgandi. Lekin aynan «Palermo» golini nishonlash uchun sarflagan vaqt uchun yana 1 daqiqa qo‘shishiga to‘g‘ri keldi. 123-daqiqada «Kalyari» g‘alabani ilib ketdi.