Bugun O‘zbekiston futbol assosiasiyasi birinchi vise-prezidenti Ravshan Irmatov boshchiligidagi O‘FA delegasiyasi viloyatdagi futbol infratuzilmasi bilan tanishish, yosh futbolchilar uchun yaratilgan shart-sharoitlarni o‘rganish, viloyat futbol assosiasiyasi moddiy-texnik bazasini yaxshilash, «Qizilqum» klubi tizimida mavjud muammolarni bartaraf etish maqsadida Navoiyda bo‘ldi.
Dastlab delegasiya a’zolari tomonidan viloyat futbol akademiyasi sharoitlari o‘rganildi. Akademiya murabbiylari va xodimlari bilan suhbat o‘tkazildi.
Murabbiylar terma jamoalarga futbolchi yetishtirishda zamonaviy ish uslubi va texnologiyalarni o‘zlashtirishi maqsadida IT markazi bilan hamkorlikda akademiyada maxsus kurs tashkil etilgan bo‘lib, unda tahsil olgan murabbiylarga sertifikatlar topshirildi.
Shuningdek, Navoiy shahridagi «Yoshlar» hamda «So‘g‘diyona» o‘yingohlari ham ko‘zdan kechirildi. U yerdagi muxlislar, jamoalar va ishchilarga yaratilgan sharoitlar o‘rganildi.
Kerakli tavsiyalar berildi. Delegasiya a’zolari Karmana tumanida yangi tashkil etilayotgan viloyat futbol maktabi infratuzilmasi bilan ham tanishdi.
