Бугун Ўзбекистон футбол ассоциацияси биринчи вице-президенти Равшан Ирматов бошчилигидаги ЎФА делегацияси вилоятдаги футбол инфратузилмаси билан танишиш, ёш футболчилар учун яратилган шарт-шароитларни ўрганиш, вилоят футбол ассоциацияси моддий-техник базасини яхшилаш, «Қизилқум» клуби тизимида мавжуд муаммоларни бартараф этиш мақсадида Навоийда бўлди.

Дастлаб делегация аъзолари томонидан вилоят футбол академияси шароитлари ўрганилди. Академия мураббийлари ва ходимлари билан суҳбат ўтказилди.

Мураббийлар терма жамоаларга футболчи етиштиришда замонавий иш услуби ва технологияларни ўзлаштириши мақсадида IT маркази билан ҳамкорликда академияда махсус курс ташкил этилган бўлиб, унда таҳсил олган мураббийларга сертификатлар топширилди.

Шунингдек, Навоий шаҳридаги «Ёшлар» ҳамда «Сўғдиёна» ўйингоҳлари ҳам кўздан кечирилди. У ердаги мухлислар, жамоалар ва ишчиларга яратилган шароитлар ўрганилди.

Керакли тавсиялар берилди. Делегация аъзолари Кармана туманида янги ташкил этилаётган вилоят футбол мактаби инфратузилмаси билан ҳам танишди.